Pinakamasiram na Namit

Tigsik

Tigsik ko an honesto kong sadiri ko na nagtaram

Na mas importante an kwarta sa rawitdawit,

Kaipuhang mainot an tulak,

An pagsalbar sa mga plato

sa dagit nin sakuyang mag-ina...

Mas makaugmahon an ngirit na pwedeng itao nin mga padaba.

Piggasod ko an sakuyang puso na nagbutog sa dagit

Ta an sakuyang bulawang oras para sa pamilya 

Muya ko pa nanggad

Salidahan ki mga metapora,

Makasadiri, makasadiri...

 

Mahalnason an kwarta sa kamot buda

Sa bulsa na daing istorya,

Sa malilipot na bulan

Sepia an kolor nin harong,

Pero diputa an literatura

Daing maginibo an sakuyang arkitektong kamot na epileptik,

Kaipuhan niyang magbayle

Pag an musa nag-aabot.

 

Dipisil pag nag-iiwal an mag-agom,

Pag an aki naghihibi,

Pag namamate an taggutom na pwedeng magrani,

Pero an kaugmahan

Mas dipisil gadanon.

Dai ini Masasabutan nin Sarong Manrarawitdawit pag Pigtaram Mo Saiya:

Lapaon man an gibo mo boi!

Pero dai mo ito matataram saiya ta dai kang sugok,

Kaya ini na sana an saimong matataram:

Maurag.

Hahaputon ka niya:

Nata?

Dai niya masasabutan an simbag,

Kaya gilayon tataramon mo saiya:

Maurag!

 

Saro Ining Rawitdawit

Ha?

Iyo?

Nata?

Tanganing?

Inda!

Basta…

Paghahalat

Banguing daing nag-aabot na bisita

Sa mesa, pagal na

An pluma buda papel

Sa paghahalat,

 

Nagbuhat...

may tingog an bintana na dai pwedeng dai dangugon,

Arog kan kansyon kan mga banguing pighahalat ko an sakuyang kabanga…

 

Sa pagtangad,

Pigsuratan ako nin mga bitoon:

An gayon nin daliwawa

Para sana sa mga may pusong

kayang kaputan an saindang hinangos sa bangui.

 

kun kataning ta an satong kadagit sa bangui

Photograph by Romalyn D. Casia

Taken at Magallanes, Sorsogon

link -- correction

Pigtao sato ni Gugurang an Bangui

Garo nakahiling sato gabos ki mga bitoon,

Nainspirar garo sinda

Ta nakayanan ta su lipot

Nin baybay digdi sa Tulong Gapo.

 

Garo kita an may kagsadiri nin bangui...

Daing kusog an matanga

Tanganing pugulon kita,

Ngunyan pa,

Ngunyang nakua ta na an simbag

Satong pangadyi.

*Tulong Gapo -- Sarong resort sa Bacon, Sorsogon