Ilusyon

Dai ako nagmulmog duwang aldaw

Saimong liwoy mantikilyang

Nagmara sa bubon.

 

Nahiling kita sa harayo,

Pigrani kan sakuyang karne

An parong mong inadobong masetas,

 

Kan nagkasararo kita

Sa bangui,

Ika an bulan,

Na nagpalangkaw sakuyang mga hukol,

Alagad arog kan namit nin gabos na siram,

Kaipuhang magpaaram.

 

Duwang aldaw na daing sipilyo,

Iyo man sana an maitatao kong elehiya

Sa rekwerdos,

Sa namit ta ilusyon…

Ilusyon.

Manungod sa Pagkamoot

Piggibo an tubig

Ta an halunan burak

Na nangangaipuhan ki uran,

An ngimot na garo dai nahadukan

Nagkakaigwang mga kalot

Kun sain igwang may mga saday na linog,

 

An sakuyang puso

Dagang mara

Na nangaipuhan ki dumog,

Pagkamoot na hinangos,

Sarong aldaw nakua…

Sa daplos buda sa kikig

Nagkaigwang kataning, kadukot,

Alagad an pusong dagang dumog

Mas pasil na nagkaigwang luho.

Tigsik

Sa huna ko dai na ako magurang

Sa huna ko dai na ako magurang,

Mapapasa sakuyang payo bago ako mag 21,

Bungog kaya ako sa mga simbag

Nin mga may ikog na gurang,

An Padi garo an maestra ko sa eskwelahan.

Ginebra an lemonada sa init nin aldaw,

Aso an kakugos sa lipot nin diklom,

Laman an diyos nin sakuyang karne.

Ngunyan 29,

Naghahangos dawa dipisil,

Nakaukod sa lugad sa laog na haluyon maghali.

Pag may nahihiling akong mga aki

Aram ko magurang sinda,

Maswerte sinda kun magurang sinda.

Sarong tigbabayong hapon sa salog

Bisikleta sa salog,

Sa may baybay padis nin tsinelas

Buda bado,

Palataw-lataw

Sa tubig buda imahinasyon,

Masiram kuta kun may sigarilyo sa kamot.

Sa mga suhang dampog may nahihiling,

May dragon,

Bayong, ikos, mga mata, daragang magayon,

An dumog nin haraning diklom muyang agumon,

Alagad muyang maghibi kan nadaog nin lipot.

Tiwala

An parong nin aldaw sa mga pasang gapo

Garo parong nin pahamot mong nasusulo,

An mga dampog na garo pasang salming

Garo mga mata mong nag-uutik,

An dagat na pirmi an hinghing

Garo pangako mo na pigsurat sa tubig,

Dipisil malingawan

An kulog na pigtatoo sa puso,

Pwede man kun habo kong mareparo

Alagad kaipuhang mag-agi an salog nin panahon,

Tanganing magdukot an satuyang kublit

Kun muya ta pa,

Sa ngunyan,

Maray,

Kun yaon ka sa kun sain dai ko aram,

Ta ika man nagkakarigos sa haldat

Pag saimong narurumduman an pigkurit mong maraot.

An tiwala garo barahibo ki bayong na pigpalayog ta sa paros,

Dai ta na aram kun pira

Pag sa daga naghadok.

Libog

Pagkamundag

Libog

Pagkagadan

 

Pagpadaba

Libog

Dagit

 

Langitnon

Libog

Daga

 

Ika

Libog

Ako

 

ABKAT

Libog

Kabulig

 

Albay

Libog

Naga

 

Manila

Libog

Albay

 

Rawitdawit

Libog

Pagkurit

 

Libog

Libog

Libog!