Botika

Pigkakahuron ninda ako na magpakaray,

Dai ko daa muna walaton an sakuyang lawas,

Nadadangog ko sa paros an hinangos nin mga masetas,

Dawa su mga bayong,

Sa paghiro nin mga alang na dahon

Buda mga baybay,

An tingog nin dagat

Gabos sinda nagtataram

Na may bulong an gabos na hilang.

 

Bulong sakuyang magagabat

Na dalagan

Sa daga,

Sa gapo

Sa awot na dumog

An saindang mga kansyon.

 

Pigdadangog nin sakuyang puso

An sakuyang pag-abo,

Nakakaukod...

Dangugon an pangadyi

Nin mga ayam,

Namamatean ko

Saindang mga mata na nakadukot sakuyang naglalakaw,

An sakuyang mga bitis

Magian,

Dawa an sakuyang puso magabat,

 

Libreng bulong

Pag kaiba ko sinda

Sa panahon na an sakuyang anino dai ko bisto,

Dai ako pigkukurab

Ta an sakuyang mga kairibanan tunay.

May mga banguing pigkukugos ko an amnesia

Mara na an ugma,

Aldaw, yaon ka na palan,

Kaipuhan nang maghiro,

Mga burak,

Mga ayam, hello,

Kaipuhang magkarigos,

Pamahaw atyan na,

Kaipuhang maglaog

Bago mag-8 nin aga,

Kaipuhan,

 

Kuta, atyan, pag-uli ko,

Pagkakaon,

Pagkahiwak,

Sa sakuyang pagdalagan

Sa hararom,

An sakuyang tulang kuta masugpon,

An salog sakuyang puso matuninong,

An daga giraray madumog

Tanganing may kusog pagkamata.

 

Langit an Asukar

Nagdadalagan an mga tanga

Sakuyang bitis

Pasakat

Sa tahaw nin sakuyang kamot

Kun sain an saindang mga kairibanan

naglalangoy

Sa bulod nin asukar,

Dai sindang talenga

sakuyang pangadyi

Na piglalamos

Nin kulog nin buot,

Daing kusog an diabetes

sa itom nindang dugo.

 

Sakuyang mga muro

Nakahiling sa mga dampog

Na an gabat nin itom

Buminagsak sa mga saday nindang payo,

Piglaog saindang alimantak

Na naghahanap ki ugma.

 

Sakuyang mga kamot dawa sa harayo

Mapaparong an hamis,

Sa mas harayo

Mga baranggay nin tanga

Nagdadalagan

Naggagasudan.

Sa mas harayo,

may mga tangang naghahanap

ki mas mahamis na bulod nin asukar.

 

29,

29

Na palan ako

Kasuhapon,

 

Dai ko namalisyahan

Ta dakulon an handa,

An mga nakarumdom.

 

Pig-iwasan ko

An nagruruluwasang mga hapot,

Makaskas sinda,

Nasukol ninda ako sa bangui

Paghali nin mga mauugmang anino.

 

Kagadanan,

Yaon na ako,

Maugma,

Ta dai akong magiginibo,

Kaipuhang rumdumon oro-aldaw

An nagraraning pagkautsan.

 

Maugma sa pagkaaram sa katotoohan.

 

29,

Garo balisong,

Kurab sa halunan

Sa mga masunod na numero.

 

 

 

Salming kan Sakuyang Ataul

Muya kong pirming makarumdom

Kaya sa ward ako nagduduman

Duman sa Provincial,

Duman kun sain lambang aldaw may nagagadan,

May madadangog akong mga hibi,

May mamamate akong dumog sakuyang puso,

 

Sa pag-agi nin pamilya bulig-bulig an malipot na lawas

Na nakapatos sa tamong,

Rumdom ko an mga hapot na may lyabe,

Pano kun an barkada o pamilya ko an masunod?

 

Ayos sa ward ta dakul an makakahiling sa pasyente

Kun bigla an paghaldat nin paros sa puso,

Duman dakul an istoryahan,

Iyo sana, 

Gabos mamunduon an sakuyang nadadangog,

Pero maray na ini

Sa mga kwentuhang friendster, Multiply, girlfriend buda boyfriend,

 

Elibs ako sa Radio Active Sago Project

Sa kanta ninda na,

“Marami ng nagugutom sa mundo, fashionista ka pa rin,”

Buda dakul na an nagagadan sa mundo, 

Sex, drugs and rock and roll an piggagasod ta.

An makulog,

Pagluwas sa ospital,

Pagluwas digdi sa ward,

Malilingawan na an mga hibi,

An pandok kan mga nawalat,

An parat nin katotoohan

Ta maliwanagon sa mall,

Magagayon su mga babayi,

Su mga bado na muyang bakalon,

Garo sinda mga totoo, na dai sasalidahan,

Itatapok sana sa hudyan,

Kaya sige sana,

Kun makalingaw,

Madigdi na sana ako gilayon (Kahirak man),

Sa ward,

Tanganing maghiling, makimate,

Ta masiramon an mga pagkaon sa private,

Dai ko mahihiling duman an salming kan sakuyang ataul. 

Sarong pagkamoot sa medyo harayo

 

Krishna, aki ko,

Pigsisipon ako

Kaya garo ka mahamot na burak

Na dai pwedeng parungon

Nin sakuyang dungo na naghihibi

Ta naparayo sa pigmomootan,

Dai mo pagisipon na harayo

An sakuyang pagpapadaba,

Kaipuhan pano

Ta baad ika maluyos,

Saimong pagkaalang,

An puso ko iyo man.

 

Kaya sa pisngi na sana

Buda sa angog mong dapluson

Kun dai ko na mapugulan,

Sa liog mong mapuluton

Kun an kalintura nin pungaw magsangsang,

Makukuryente an saimong ulok 

Sakuyang hinangos,

Na magpapakaray sakuyang pagmate.

 

 

Ako buda an Lamok

Kun may ngipon ka lamok,

Kakaunon mo ba ako?

Pirang aldaw bago mo ako mahahali digdi?

 

Lamok,

Kun muya takang kaunon,

Kakahurunon mo pa ako baya?

 

…Dipisil magkaturog,

Kun dai mo aram an silensyo, an tuninong,

Maghali ka na.