Sa huna ko dai na ako magurang

Sa huna ko dai na ako magurang,

Mapapasa sakuyang payo bago ako mag 21,

Bungog kaya ako sa mga simbag

Nin mga may ikog na gurang,

An Padi garo an maestra ko sa eskwelahan.

Ginebra an lemonada sa init nin aldaw,

Aso an kakugos sa lipot nin diklom,

Laman an diyos nin sakuyang karne.

Ngunyan 29,

Naghahangos dawa dipisil,

Nakaukod sa lugad sa laog na haluyon maghali.

Pag may nahihiling akong mga aki

Aram ko magurang sinda,

Maswerte sinda kun magurang sinda.

Kun magadan ako ngunyan uran

Kun magadan ako ngunyan uran,

Puro-pirmi,

Pag yaon ka,

Mantang dumog an daga,

Mamamate ninda an sarong kikilat

Na muyang bangaon

An gabos na igwa sinda,

Mas makulog an pagkalamos na mamamate nin mawawalat,

Tinataram ko sainda,

Garo sana ako pasi nin luha nin langit sa burak,

Magayon hilingon

Alagad dai na ninda ako makakaputan,

Maabot,

Mamara,

Mahali ako,

Alagad habo ko ngunyan

Ta habo kong igwang madipisilan.

Pag ako nagadan

Dawa awot ako

Sa langitnon

Basta si Gugurang sakuyang kaiba,

Dawa baybay ako

Basta an Pinakamagayon magdalagan sakuya,

Buda sakuyang daghan maghigda,

Dawa tubig ako,

Sarong salog,

Basta iinumon nin pahang halunan ni Padaba,

Pag nagadan ako,

Saro man sana an pangadyi ko,

An makauli

Sa pig-aapod nindang Vrindavhan.

Kun maging mabuot an kinaban sakuya, gilayon

Asi,

Buhay pa palan ako,

Maray na aga saimo kwarto,

Atyan mahilingan kita

Gilayon,

Kun an kinaban maging mabuot

Giraray

Sakuya.

Pagkamundag -- Pagkagadan

Kagadanan an naghahalat saimo Krishna,

Kan pig-aki ka,

Duman dadarahon nin paros an saimong lawas,

An satuyang ati,

Na garo lumaong bado na kaipuhan walaton,

Sana dai mo ito pagkaputan pag kaipuhan mo nang maghali

Ta magigisi, mas mararaot, mas dipisil maghali

Digdi sa dagang dai ta bisto

Dawa haluyon na kita digdi.

Pigdadangog ko na an kansyon nin kautsanan,

Iyo man sana an pangadyi ko para saimo,

An maaraman mo,

Na dangugon mo

Na an satuyang harong bako digdi sa daga.

Bago ka maghali, padaba

Kun magkahilang ka,

Magkakahilang ka, kita,

Dai kita makakadalagan sa maabot,

 

Pag nagkahilang ka padaba,

Pag may namamatean ka,

Taramon mo sakuya an makabasag pusong falsetto

Nin saimong tulang buda dugo

Na barado ki aserong kurab,

 

Dai mo pag-isipon an kulog na maapod sakuya

Sa mga banguing kaipuhan ko sindang kahurunon,

Kaya kong humampang saindang kaito ko pa bisto.

 

Dai ko hahanapon an bulong sa tubig, sa paros na dai makaputan,

Dai akong magiginibo

Dawa maubos an sakuyang daplos,

Dawa magmara an sakuyang dugo,

Sakuyang maugmang pagbalo

Na an sakuyang nakuang uli,

Dismaya.

 

Saro man sana an kaipuhan ta,

An marumduman si Krishna, si Jehovah…

Dai kita an satuyang lawas,

Dai kita an isip,

Gabos digdi, garo sana subo,

Padaba,

Ini an sakuyang patotoo na padaba taka,

Kun magibo kong marumduman mo Siya

Pag namate mo na an harani…

 

Maugma ako na namidbitan taka sa buhay na ini,

Saro kang burak na nagwalat ki hamot nin pahinuhod

Sa puso kong sagkod ngunyan

Estudyante nin pagkamoot.

 

29,

29

Na palan ako

Kasuhapon,

 

Dai ko namalisyahan

Ta dakulon an handa,

An mga nakarumdom.

 

Pig-iwasan ko

An nagruruluwasang mga hapot,

Makaskas sinda,

Nasukol ninda ako sa bangui

Paghali nin mga mauugmang anino.

 

Kagadanan,

Yaon na ako,

Maugma,

Ta dai akong magiginibo,

Kaipuhang rumdumon oro-aldaw

An nagraraning pagkautsan.

 

Maugma sa pagkaaram sa katotoohan.

 

29,

Garo balisong,

Kurab sa halunan

Sa mga masunod na numero.

 

 

 

Salming kan Sakuyang Ataul

Muya kong pirming makarumdom

Kaya sa ward ako nagduduman

Duman sa Provincial,

Duman kun sain lambang aldaw may nagagadan,

May madadangog akong mga hibi,

May mamamate akong dumog sakuyang puso,

 

Sa pag-agi nin pamilya bulig-bulig an malipot na lawas

Na nakapatos sa tamong,

Rumdom ko an mga hapot na may lyabe,

Pano kun an barkada o pamilya ko an masunod?

 

Ayos sa ward ta dakul an makakahiling sa pasyente

Kun bigla an paghaldat nin paros sa puso,

Duman dakul an istoryahan,

Iyo sana, 

Gabos mamunduon an sakuyang nadadangog,

Pero maray na ini

Sa mga kwentuhang friendster, Multiply, girlfriend buda boyfriend,

 

Elibs ako sa Radio Active Sago Project

Sa kanta ninda na,

“Marami ng nagugutom sa mundo, fashionista ka pa rin,”

Buda dakul na an nagagadan sa mundo, 

Sex, drugs and rock and roll an piggagasod ta.

An makulog,

Pagluwas sa ospital,

Pagluwas digdi sa ward,

Malilingawan na an mga hibi,

An pandok kan mga nawalat,

An parat nin katotoohan

Ta maliwanagon sa mall,

Magagayon su mga babayi,

Su mga bado na muyang bakalon,

Garo sinda mga totoo, na dai sasalidahan,

Itatapok sana sa hudyan,

Kaya sige sana,

Kun makalingaw,

Madigdi na sana ako gilayon (Kahirak man),

Sa ward,

Tanganing maghiling, makimate,

Ta masiramon an mga pagkaon sa private,

Dai ko mahihiling duman an salming kan sakuyang ataul. 

Makaugmahon

Sa terminal nin bus

Kun sain an mga parahalat ki ugma,

Napangirit

Sa mga bulang

Hali sa kawatan na piglalaag sa ngimot

Nin mga aking nagdadalagan sa hinang,

Napauntok an kagadanan ki pirang minuto,

Dawa pirang minuto sana,

Mate an ugma.

 

Mga bulawang daplos

Saindang angog,

Saindang liog,

An paros

Naggagasod:

Sige sana, buhay ipadagos!

 

Sakuyang pagkagadan

Habo kong magadan

na dumog an dalan,

kun pupuwede daing luha na magtagdo

sa daga na dai makakahangos,

 

magabat an mga bitis na libong na naglalakaw,

an tipsik nin dugi,

sa bado,

sa puso,

an mga pandok, mga molaveng dampog,

su mga istorya manungod sakuya

habo kong madangog ta dai ito totoo,

dai nindo ako gibuhong diyos tanganing marumduman,

 

may makanta,

may marawitdawit,

magayon,

maugma ako,

pero dai na sana,

daing lugaw,

kapeng malipot man sana,

dai kamo magtao ki burak,

ta daing hamot an makakahali nin mundo,

 

kun muya nindo akong mapaugma,

suluon nindo an sakuyang lawas,

an sakuyang abo, dai mo ipahiling sainda padaba,

tanganing dai sindang dudumanon,

kun marurumduman nindo ako,

makaumahon baya?

Kun marurumduman nindo ako,

Sana marumduman nindo na kayo man magagadan.

 

Kun pupuwede sana,

May aldaw

Pag naghali ako,

Pwedeng may paros

Basta mainit,

Ta an gabos pwedeng mautsan

Pag namate an lipot.

 

Habo kong magadan

Na dai kamo handa,

Padaba...

Ika na an bahala.

 

 

 

 

 

 

 

Sakuyang Paggurang

Habo kong maggurang na nakahiling sa luwas

Kan bintanang dumog,

Naghahalat

Na mapagal an uran sa paglamos sa daga,

Na sa sakuyang puso, iyo man,

 

Habo kong maherak sakuyang sadiri,

Daing igos na maglakaw sa pier,

Sa dagat, 

An hukol garo matabon sakuya,

 

Pighahali nin mundo an kusog nin bitis,

Naghahalat na maging magian an lumba-lumba,

Naghahalat na maghali an gabat.

 

Habo ko man na pirming maglakaw sa dagat

Pigpapabayaan an mga nakaagi na maglakaw parani,

Pighihiling an mga aking nagkakawat sa pier,

An bulawang nagbababang aldaw

Mahihiling saindang naghihirong mga mata.

 

Sakuyang paggurang dakul akong oras para magtukaw,

Isipon an mga manungod sa hararom,

Maduduman ko an mga nakaagi,

Su mga mahamis na aldaw, na bulan,

Garo si Peter Pan kaipuhan ko itong isipon  

Tanganing makalayog,

Pero dai,

 

Gagamiton ko an sakuyang oras tanganing isipon

Kun sain ako paduman,

Kun sain ako maduman

Pag lumang bado na an sakuyang lawas

Na kaipuhan kong salidahan,

Itapok,

Kaipuhang magpreperar,

Kaipuhang dai na ako ipangaki giraray.

 

Habo ko na mamundag gilayon sa kinaban nin kirot,

Na tubuan ki kulog sa gilagid,

Makaiwal an mga barkada

Na garo nagtanom ki paroy

Na rarauton sana ki alimagyo,

Habo ko na mamuot

Kun sain mamamatean ko na sana

Na dai na akong puso,

Habo ko na magadanan,

Na an dagit magistar sakuyang daghan,

Kun sain pwede akong makagadan.

 

Sakuyang paggurang,

Saro sana,

Saro sana…

An pirmi Siyang marumduman.

 

 

Baybay

Masiramon maghigda sa baybay ta hali sinda

Sa narunot na mga lawas

Kan maghali an karapsaw nin gios.

May tali an paghigda sa dagat ta madigdi ako sa hudyan,

Dai malilikayan an padudumanan

Nin sakuyang pisikal,

Na dudurugon nin takla na itatao nin panahon,

Pirming madudumog an sakuyang wawalaton,

Na maiba sa mga bitoon sa daga na nalalamos sa pagkamoot,

Sa salidahan nin diklom buda liwanag.

 

Ako,

Dai ko aram kun pasain ako

Pag pigwalat ko na an sakuyang karne…

Sa ngunyan maati an sakuyang agimadmad,

Sana malinigan ko an sakuyang puso sa buhay na ini.

 

Muya ko na igwang baybay sakuyang dudumanon,

Dawa baybay ako sa masunod kong hinangos,

Baybay sa Vrindavhan 

Na hihigdaan nin mga baka, kaiba ninda

Krishna buda Radharani.

 

 

 

 

 

 

Pwedeng sarong aldaw

Pwedeng sarong aldaw,

Magrebelde an sakuyang isip,

Gadanon kaini an sakuyang puso,

Sa dagit tumimak…

 

An sakuyang mga kamot, pula, malansa,

Dugo an kolor nin kurab nin tigbabayong hapon

Na naghahapot kun nata dai ko nakontrol an sakuyang alimantak...

Garo may piggigibong pelikula, pighihiling ako nin mga tawo,

Mantang pigbubutong nin mga pulis paduman saindang awto,

Pwede.

 

Sarong aldaw pwedeng

Dai na ako magsurat ki rawitdawit,

Magpapabakal na sana ako ki badil arog ni Rimbaud...

Maduman man ako sa Juarez, Mexico,

Peregrinasyon sa mga banal na herenggilya,

Ibabalangibog na sana an pag-uli nin sakuyang lawas.

 

Pwedeng tatuan ko ki biyoleta

An abaga buda daghan nin sakuyang agom

Na pigpangako ko sa langit na ikagagadan ko kun sakuyang gigibuhon,

Pwedeng pagkamata an sakuyang dila, tulak, bulsa,

An mga inot kong iisipon,

Pwedeng dai na akong ibang kabisto maliban sa sadiri ko.

 

Sarong aldaw pwede man

Na magpakalbo ako,

Mag-istar sa bulod,

Suysuyon an dalan ni Samuel,

Buligon an mga pigdara ni Kristo,

Pwede.

 

Padaba mare... ta sakuyang ikagagadan

Sa mga aldaw

Na pighahalat nin sakuyang mga mata an diklom,

Tanganing duman magdalagan,

Tanganing makipaghilingan sa pangiturugan,

Na nagbubukod sakuya maski sain ako magduman,

Padaba, 

Baka an paros magbara sakuyang halunan,

Kaya mare, 

Taningon ako,

Kahurunon an paglanyag nin sakuyang daghan,

Paghurunan ta an pait,

Bago maghali an namit nin satuyang pamanggi.

 

Dipisil palayugon an ngirit na may magabat na pakpak,

Dipisil gibuhong higdaan an satuyang mga daghan na nagaarik-arik,

Daing maginibo an lipot tanganing kita magkasararo.

Dipisil...

Pero mas dipisil magkaturog

Na may pusong daing maginibo, 

Nagkikiwang-kiwang.

Kaya padaba, mare,

Paghurunan ta an mga nakaagi,

Paghurunan ta an gabos,

Kun dai mo pa kayang magtaram,

Kugusi ako,

Maluwas na sana an mga tataramon,

An pag-sabot.

 

sa maarabot na panahon

Pwedeng

Yaon pa an mga bitoon,

An dagat

Pag naggurang ako,

Dai ko sana aram kun yaon ka pa,

Kaiba sa pagmata, mahilot sakuyang rayuma,

Madala ki mainit na gatas sa higdaan

Kun ako an mas maluya,

Pwedeng nag-agom na man si Krishna…

Kun may tugang siyang pangarap na babayi,

Pwedeng pigkua na man siya satuya,

 

Kun ika… kun ika an magimata na solo

Na pigsususog nin lipot,

Balua na maglakaw sagkod kaya paduman sa dagat saimong laog,

Magduman ka sa pisikal na dagat kun kaya,

Balua na kuguson an gabos na matitipok mo na silensiyo,

Duman daing kulog an saimo makakarani.

 

Pagkamoot man sana an muya ko na yaon 

Sa maarabot na panahon,

Maski sisay satuya an mawalat,

Kun yaon an pagkamoot

Ugma mamamatean ta sa gabos.

 

 

 

 

 

Daing imposible sa siyudad

Sarong aldaw pwedeng magpiyesta an mga langaw

Sa gogon na dai basta mahihiling nin mga naghihidaling mga bitis,

An mga mamunduhon,

Dai sindang pakilabot sa pigdadarang gabat nin iba,

An mga awto na dai napapagal sa pagdalagan,

Dai sindang pagkaaram,

Muymuyon an kinaban sa mga nagsasalakang mga hururon

Manungod sa gabos na nagpapaugma sa laman.

 

Sa awot na nakatangad sa mga dampog,

Duman an sakuyang lawas, namamarong,

Duman parong an tunay na hamot nin kinaban,

Hamot na pag saimong naparong, an saimong bituka

Dai mo mapupugulang magluwas maski saing luho.

 

Siguro,

Dai ako mabibisto nin gabos,

Gabos na daing buhay na daing maginibo

Arog kan mga gusali, harong, simbahan,

Magkakabaratak na sana an saindang pintura saindang hibi.

 

Sa banguing ito,

Pag nagrani na sakuya an maraot,

Mahihiling ko na sana an sakuyang pagkaaki,

Maagi sa isip, sarong pelikulang malungsi,

Makaskas,

Sagkod sa

Mahiling ko an sakuyang lawas

Pigguguyod,

Pigguguyod kun sain dai mahihiling an sarong makangirabo...

An ribok nin mga talapang, nag-aapod nin uran.

 

 

Pag pagal na ako

Pag pagal na ako,

Buda paghali an simbag,

Paduman sa mga dahon na alang sa dalan

Na nagdukot na sa puso nin daga,

Pag buyong na ako sa hadok nin paros

Buda habo ko na magbuhat,

Maiisip ko na may mga rekwerdos pa ako

Na pwedeng kaputan,

Pagkamoot na itinao sako na daing paghagad,

Nin sakuyang agom buda aki, mga magurang, mga kabarkada,

Igwang lang garong panahon na namamatean ta an dipisil,

Mga panahong dai ta na kayang magdangog sa uran,

Maghiling sa bintana,

Mag-solo…

 

Kun magiging maugma kuta ako kun an iisipon ko ako sana,

Pero habo ko kamong mahiling na nagtatangad sa tagiti,

Sa dumog na mga burak,

Haruyuon kamo sa mga harani,

Habo kong mamatean nindo an namamatean ko,

 

Maabot man garo an panahon nin kusog,

Pangadyi garo an simbag

Pag an kalag pagal na sa mga hapot…

 

Sa mga awot na dinuduman ko,

Sa mga limpoy,

Sa diklom,

Maugma kuta kun maghilingan kita giraray

Na igwa akong bulan sa labi.

 

 

Pauli

Pauli,

Nagkakawat sa isip an mga pandok kan mga naghahalat,

Pighahatod nin dalan na an pangaran sarong hapot,

Pigkakaputan ko an mga imahe ninda pati an mga boses sagkod kaya,

Ta dai ko aram kun kumpleto pa sinda paguli ko

O makumpleto pa sinda,

Dai ko aram.

An Muya kong Masabutan

Kan aki pa ako

Nasabutan ko na

An hudyan,

Pero kun pwede,

Daing mahibi

Ta wara man itong magiginibo.

 

Habo ko na magadan na garo ayam;

Basta na sana mangimigkimig sa tinampo,

Ah, kun muya nin mga tawo na agihan sana

An malipot kong lawas,

Dai akong labot,

 

Dai akong labot…

An muya ko sana,

Masabutan ko

Kun pano maging tawo.

Introspeksyon

28…

Pirang bulan na sana, 29,

…pag naggugurang palan,

Mas pasil na an maghampang

Sa siguradong pag-abot nin hilang.

 

An paghampang sa salming

Na ataul an nahihiling,

An hamot nin tigbabayong hapon

Na magurang nin burak nin kagadanan,

maluwag na sa sakuyang buot an gabos.

Ah, namamatean ko garo ini

Ta igwa na naman akong nawalat 

na kagayunan sa kinaban,

Sa hiling hiling ko…

 

Kun pupuwede sana

Na dai na ako mamundag giraray…