An lyabe sa tuninong nakua sa pagdakop nin hangos

Ngipon kan mga tawo sa bangui perlas,

An kalag nin saimong mata man kimigkimig pag ito saimong mahiling,

Sinda na nagkakanta sa tinampo, sinda na kapot kamot sa gilid kan simbahan buda plaza,

Ika na solo sa diklom na nagkaon saimong kalag,

Gare ako ito… kaito,

 

Ngunyan dai mo na ako mahihiling, naglalakaw na daing padumanan sa Tabaco sentro,

Sisay ako pag bangui ?

Ako an harong nin bangui , kataning padaba ko buda aki ko na naghahalat pighahalat magluwas,

 

Maugma an magkaiwang hangos na kayang kaputan,

Minabuka an mata nin angog, nagsarabatan an enerhiya sa kiray, at sakuyang namatean katuninungan

Na kaito mahalnasong maray, gare paros nin aligmayo.

 

Minahiling na sana sakuyang talenga sa luwas,

An bayle nin mga dahon, an sonata kan mga kulisap, an hiro nin ngimot buda bitis nin mga ayam.

 

Kinaban na nagsadit na sana sakong pigistaran,

Sadit na kinaban na pano nin masetas sa natad geograpikal buda pangiturugan na muklat,

Sadit na kinaban, ika an tulay na maghahatod sako sa ugma,

 

Bangui, ika an tunay na kolor nin kinaban, an diklom na sakuyang tulang

Na Luway luway nababatak sa pagbagal nin tibok nin sakuyang puso,

Luway luway an pagrani mo ugma sa pagkapot ko sakuyang hangos,

Sakuyang hangos na sinhalaba nin bangui sa mga tao na solo solo sa Tabaco sentro.