rawitdawit

Buhay may Pamilya 2011

2011-09-11T04:52:00.000-07:00

Duwang kape sana sa sarong aldaw

Sarong basong gatas sarong aldaw,

One cup rice sa ugto, pamangihan,

Kun makaong instant pansit canton,

Gibuhon nang kumpletong isira;

Kaagan ki gulay buda spices,

Sarong patos ki tasty bread

Pang duwa o tulong aldaw,

Makatipid,

Maniwang man ki diit,

Ah,

Ini an buhay may pamilya,

Kun manluya sa bangui

Pwede man na duwang basong gatas

Pagkaaga buda duwang platong maluto sa pamahaw,

Minsan pwede man na may serbesa,

Alagad mas maray kun hali sa kainuman.

Septyembre 11 rawitdawit

2011-09-11T01:12:00.001-07:00

Naaalang solong pulang Shanghai Lady,

3pm sa higod,

hababa an anino kan aki kong

nagdudurudalagan sa higod,

nuarin daw mabuskad an Rosal?

naghihidaw ako sa mga kalibangbang,

luto na daa an hotcake sabi ni agom,

su aki ko,

nagdadalagan kaiba an ayam

parani sakuya,

an hinghing kan paros

sabay sa mga siwik kan aki ko,

sabay man sa pag-apod gilayon ni agom.

Isip ko Ukay Sarong Banguing Matanga

2011-09-08T18:45:00.001-07:00

Ma Red Horse o dai?

Habo kong mag sounds

baad maghali an pirot,

3 weeks daing yosi,

naka 3 tasa na akong kape.

Turog na sinda,

an beerhouse mata pa.

Silensiyo sa banyo…

may Redtube,

crackers buda Von Trier,

Lucky Me instant pansit canton,

Pdf Bukowski sa pda phone,

O, paturugon mo ako gilayon Hank.

3am,

mata pa an Mamay’s…

Redtube,

Instant pansit canton,

Crackers, Antichrist, Charlotte Gainsbourg,

Diputa,

Good night,

May trabaho pa atyan.

Sa Pagmawot

2011-08-29T19:44:00.000-07:00

Labi kan pigpadaba kong mga babayi

Sakuyang natanaan,

pigduduman ko sa pangiturugan,

pigduduman ko sa pagreparo

ta masiram.

May mga namit pulutan,

may mga hadok na minataram

na an gabos

may kasagkuran.

May panahon na ako an inot na nagdoot,

minsan kugos ninda paros na nagaabot,

pigpabayai ko sana

ta kamurawayan.

An katalingkasan minabulanos mantang naggugurang;

mas mahamis an hadok buda kapot

mantang nagmamawot.

Sarong Bangui -- Prep 2

2011-08-05T04:55:00.000-07:00

Lim Family

2011-08-05T04:53:00.000-07:00

Oroaldaw Domingo BTS

2011-07-09T18:47:00.000-07:00

Water Butterflies.

2011-05-09T19:35:00.000-07:00

Ta Narumduman Mo

2011-05-09T19:33:00.000-07:00

No Showing

2011-05-07T19:38:00.000-07:00

Erik

2011-05-07T19:35:00.000-07:00

Pagtalubo Art Exhibit

2011-05-07T19:28:00.000-07:00

Ang Buhay ay Pagmamasid sa mga Ibon.avi

2011-05-07T19:27:00.000-07:00

Pinakamasiram na Namit

2011-05-07T19:26:00.000-07:00

2010-07-18T19:09:00.000-07:00

Ta Narumduman Mo

2010-02-12T09:45:00.000-08:00

Pininyahang magic meat na may mushroom

Buda pinya,

Narumduman mo…

Nabasa ko su surat mo,

Dai ko naubos an maluto,

Ugaring pig-asay ko an isira,

Pig-ref ko an tada,

Dai ko masabutan an mga artista sa teleserye,

Maray pa an paros sa higod,

Nagpapahiwak ako ngunyan nakatangad sa lipot,

Ika man garo…

Dai ako ma-yosi

Ta narumduman mo.

Kun pagal na an gabos na mga makina

2010-02-11T07:19:00.000-08:00

Kun pagal na an gabos na mga makina,

lana sa labi

an mahiling ka,

mapulot an pagmaan kong

dilang nagbabayle sa parong

nin saimong gasolinang

dagta nin mga prutas,

namit nin bulan,

hamot nin mga bitoon,

ugaring pagal na an gabos na mga makina,

nagbabaratak an takla sakuyang tulang,

may aso sakuyang dugo,

pighihinang an paros.

An tingog nin TV,

nin orasan,

punembreng Chopin.

Makakasabot an tamong,

an ulunan, kutson,

ugaring pagal na an gabos na mga makina,

mara akong salog,

pahaunon

sa dai mabukasang serbesa.

Dawa Sain Yaon Ka

2010-02-09T02:58:00.000-08:00

Pag dai na taka mahiling

Dai na taka marurumduman,

Alagad kamot mo an dagat

Na muyang magpakarigos sakuyang lawas,

Mata mo an aldaw

Na an hamot kabasan nin burak,

Hinangos mo an paros,

An baybay saimong daghan,

An mga bulod saimong sensasyon,

Mga puno saimong bariksan,

Mga bitoon saimong mga pangako,

Pigpaparumdom nin daplos

Mga bangui nin satuyang mga pagkasararo,

Pigpaparumdom nin kimig-kimig

Saimong mga abaga,

An halabang biyahe saimong buhok,

An pagkapaha saimong mga labi,

Makaulok,

Yaon ako ngunyan harayo saimo,

Tibaad dawa sain yaon ka palan,

Pwede kong kaputan

Pwede kong namitan.

Digdi sa Harayo

2010-02-09T00:26:00.000-08:00

Digdi na sana sa harayo ko hihilingon an mga bundok,

dipisil madisgrasya,

digdi sa harayo,

kaya ko mang namitan an hamis

nin daplos sa ngimot

buda mga saday na linog sa kamot

nin mga nagsasakat

sa siram.

Dai mo Taramon na Tatao ako Magpadaba

2010-02-07T22:59:00.000-08:00

Dai mo taramon na tatao ako magpadaba

Sagkod buhay pa ako,

Baad sadiri ko man sana an sakuyang minoot.

Kun namamate mo na pigpadaba taka,

Maaaraman ko sa kadlangan nin silensyo,

Maluwas an bangraw sa mga luho na igwa ka,

Ta an ugma garo brilyante.

Taramon ta na sana an pagsabot sa sarong maan,

May taramon an pagkamoot

Na an mga nagpapadaba sana an nakakasabot.

Meditasyon Pagkamata

2010-01-21T06:21:00.000-08:00

Kape,

asukar,

creamer,

sa tahaw nin ipo-ipo

sarong bayong

luminayog.

Pirmi, may nagsosolong uminom

2010-01-06T06:57:00.000-08:00

Pirmi, may nagsosolong uminom,

Sa mga lugar na aram ta

Alagad dai ta na pigduduman,

Mamamalisyahan na sana

Na kabisto idtong nag-iinom sa diklom,

Mamamate na sana

Na muya mong magrani

Ta nagpamate an haldat

Na namandong sa magkapirang bangui.

Kun mabuyong an pagkamoot, pabayai sana,

Kun sa pagkabuyong matataram

An gabos na kamunduan sa bangui.

Ilusyon

2009-09-08T18:39:00.000-07:00

Dai ako nagmulmog duwang aldaw

Saimong liwoy mantikilyang

Nagmara sa bubon.

Nahiling kita sa harayo,

Pigrani kan sakuyang karne

An parong mong inadobong masetas,

Kan nagkasararo kita

Sa bangui,

Ika an bulan,

Na nagpalangkaw sakuyang mga hukol,

Alagad arog kan namit nin gabos na siram,

Kaipuhang magpaaram.

Duwang aldaw na daing sipilyo,

Iyo man sana an maitatao kong elehiya

Sa rekwerdos,

Sa namit ta ilusyon…

Ilusyon.

Manungod sa Pagkamoot

2009-08-06T09:18:00.000-07:00

Piggibo an tubig

Ta an halunan burak

Na nangangaipuhan ki uran,

An ngimot na garo dai nahadukan

Nagkakaigwang mga kalot

Kun sain igwang may mga saday na linog,

An sakuyang puso

Dagang mara

Na nangaipuhan ki dumog,

Pagkamoot na hinangos,

Sarong aldaw nakua…

Sa daplos buda sa kikig

Nagkaigwang kataning, kadukot,

Alagad an pusong dagang dumog

Mas pasil na nagkaigwang luho.

Tigsik

2009-07-20T22:46:00.000-07:00

Sa huna ko dai na ako magurang

2009-07-09T07:24:00.002-07:00

Sa huna ko dai na ako magurang,

Mapapasa sakuyang payo bago ako mag 21,

Bungog kaya ako sa mga simbag

Nin mga may ikog na gurang,

An Padi garo an maestra ko sa eskwelahan.

Ginebra an lemonada sa init nin aldaw,

Aso an kakugos sa lipot nin diklom,

Laman an diyos nin sakuyang karne.

Ngunyan 29,

Naghahangos dawa dipisil,

Nakaukod sa lugad sa laog na haluyon maghali.

Pag may nahihiling akong mga aki

Aram ko magurang sinda,

Maswerte sinda kun magurang sinda.

Sarong tigbabayong hapon sa salog

2009-07-09T07:24:00.001-07:00

Bisikleta sa salog,

Sa may baybay padis nin tsinelas

Buda bado,

Palataw-lataw

Sa tubig buda imahinasyon,

Masiram kuta kun may sigarilyo sa kamot.

Sa mga suhang dampog may nahihiling,

May dragon,

Bayong, ikos, mga mata, daragang magayon,

An dumog nin haraning diklom muyang agumon,

Alagad muyang maghibi kan nadaog nin lipot.

Tiwala

2009-07-09T07:21:00.000-07:00

An parong nin aldaw sa mga pasang gapo

Garo parong nin pahamot mong nasusulo,

An mga dampog na garo pasang salming

Garo mga mata mong nag-uutik,

An dagat na pirmi an hinghing

Garo pangako mo na pigsurat sa tubig,

Dipisil malingawan

An kulog na pigtatoo sa puso,

Pwede man kun habo kong mareparo

Alagad kaipuhang mag-agi an salog nin panahon,

Tanganing magdukot an satuyang kublit

Kun muya ta pa,

Sa ngunyan,

Maray,

Kun yaon ka sa kun sain dai ko aram,

Ta ika man nagkakarigos sa haldat

Pag saimong narurumduman an pigkurit mong maraot.

An tiwala garo barahibo ki bayong na pigpalayog ta sa paros,

Dai ta na aram kun pira

Pag sa daga naghadok.

Libog

2009-07-07T05:41:00.000-07:00

Pagkamundag

Libog

Pagkagadan

Pagpadaba

Libog

Dagit

Langitnon

Libog

Daga

Ika

Libog

Ako

ABKAT

Libog

Kabulig

Albay

Libog

Naga

Manila

Libog

Albay

Rawitdawit

Libog

Pagkurit

Libog

Libog!

Sa Girumdom na Sana

2009-07-07T05:09:00.000-07:00

An kaday mo na sakuyang hidaw,

Paros na mahalnas,

Nagbabakay ako sa pag-reparo,

Sierto duman yaon ka.

Pagkamoot ko pig-lustab mo na,

Mga mata mo na gapong nagkakalayo,

Nagtuga,

Kaipuhan mo ki distansiya,

Distansiya…

Dai ko masabutan,

Baad habo kong masabutan…

Pag-girom mo an hawong

2009-07-07T04:50:00.000-07:00

Naghuhuron an talapang buda an Santan,

Sa may gripo,

Sa mga gapo na dumog,

Yaon ako,

Dai nagtutubod na solamente sakuyang mga taramon.

Sain na pigdara nin paros an uran?

Atyan na ako makakan

Pag malinig na an kusina,

Pag pirutunon na an paros,

Kakahurunon taka pag turugon na ika,

Baad magsimbag an langit.

Barayle nin mga pandama

2009-07-03T18:06:00.000-07:00

Pigbabasa ko an sarong librong tapos ko nang basahon,

Habo kong makalingaw,

Piglakaw ko an mga dahon nin nakaagi;

Paduman sa burabod nin dunong na naghali.

Alagad, nagpaparabayle an sakuyang mga mata

Sa bangraw na nagkatok sa bintana,

May gatol sakuyang dila

Hali sa tsokolate na nag-aapod sa mesa,

Nadadangog ko an kansyon nin mga bayong,

Pigdara nin paros an hamot nin mga masetas…

Nagtimpla akong gatas,

Nagduman sa higod,

Sa naghahalat na mga pasang gapo

Kun sain harani an mga nagkakawat na ayam,

Dara-dara an libro,

Na pigpatungan ko na sana

Ki baso nin mainit na gatas.

Kun magadan ako ngunyan uran

2009-06-23T08:04:00.001-07:00

Kun magadan ako ngunyan uran,

Puro-pirmi,

Pag yaon ka,

Mantang dumog an daga,

Mamamate ninda an sarong kikilat

Na muyang bangaon

An gabos na igwa sinda,

Mas makulog an pagkalamos na mamamate nin mawawalat,

Tinataram ko sainda,

Garo sana ako pasi nin luha nin langit sa burak,

Magayon hilingon

Alagad dai na ninda ako makakaputan,

Maabot,

Mamara,

Mahali ako,

Alagad habo ko ngunyan

Ta habo kong igwang madipisilan.

An Dagit

2009-06-23T07:45:00.000-07:00

Alas an dagit na dai maitaram,

Dai makabatok,

Dai tataong maggasod,

Luway-luway an pag-ilo

Sa pusong sa itom na liwoy nalalamos.

An dagit,

Alas na payo man an puro,

Duwa an dila na espada an tarom,

Saimo,

Buda saimong kaiwal

Na piggibuhan mong altar na itom.

Sa daghan,

An alas naghahalat

Sa pagsupay nin dagit,

Makamang,

Maluwas,

Kun dai saimong ngimot,

An payo maluwas

Saimong nangingimigkimig na kamot.

Asi,

2009-06-20T23:27:00.000-07:00

Pagkamata an pamahaw

Paghiling sa uran,

Pagmate sa tigsik sa kublit

Na garo pigdudutdot nin mga kerubin,

Nagkukugay an lipot buda init sakuyang lawas,

Garo ako gadan na nabuhay,

Sa pintuan nakatukaw, tuninong,

Sa kusina sa likudan may nag-aapod,

Alagad makusog an pag-apod nin uran,

Isnab sa sabaw na an parong higod nin mga Rosal,

Muya ko sana digdi sagkod magpondo an langit,

Muya kong ibahan an mga masetas na nagkakarigos sa hadok,

Sa labog nin asong kinaban

Nagdalagan an naghihirong mga kolor kan nakaagi,

Naisip kong magdalagan sa tagiti,

Magduman sa aldaw nin sarong aki,

Asi,

Kaipuhan munang kaagan ki mainit an tulak.

Pag ako nagadan

2009-06-20T18:54:00.000-07:00

Dawa awot ako

Sa langitnon

Basta si Gugurang sakuyang kaiba,

Dawa baybay ako

Basta an Pinakamagayon magdalagan sakuya,

Buda sakuyang daghan maghigda,

Dawa tubig ako,

Sarong salog,

Basta iinumon nin pahang halunan ni Padaba,

Pag nagadan ako,

Saro man sana an pangadyi ko,

An makauli

Sa pig-aapod nindang Vrindavhan.

Tabaco

2009-06-20T07:48:00.001-07:00

Inot kong nadangog an pangaran nin Tabaco

Kan naaraman kong sa Bicol na kami maistar,

Banwa pa kaito an ngunyang siyudad

Na may mga tinampong dipisil mamidbidan,

Tabaco garo yosi,

Asi, kun naaraman ko sana na sa sentro man sana kami maistar,

Garo dai na ako nag-iba

Kun dai ki papa na may hilang,

Muya ko kutang mag-istar sa mapuno,

kun pwede sa bulod na pig-aapod.

Pig-aarog nin Tabaco an Maynila

Dai niya garo aram na muya niyang maging kadlangan arog nin sakuyang pighalian,

Duman dai ko aram an itatao nin mga masunod na segundo,

Dakul an pwedeng magrani sa nakasaradong mga pintuan, bintana,

Sa matanga kun sain pighahanap an mahalnasong pangiturugan.

…9 na taon na ako digdi sa Tabaco,

Dai ko na bistado an San Juan, Maynila,

Habo ko na man magbalik sa ulok nin sakuyang mga barkada duman

Ta dai ko na man ito mga biristo,

Dai ko mataram na bistado ko an Tabaco

Dawa dakulon akong mga barkada sa pangaran,

Saro sana an sakuyang aram,

Mas harani sa puso an ugma sa Tabaco

Ta mas malaya an paros sa probinsiya buda mas harani ako sa kalikasan,

Alagad maabot an panahon na madarakul an alas sa tinampo

Ngunyang saro na siyang siyudad,

Pasil man sanang maaraman kun ano an naitatao nin sarong siyudad sa mga tawo,

Magluwas ka, maglakaw, ibungkaras an mata nin saimong puso.

Tubig

2009-06-16T04:29:00.001-07:00

Nagbaba an mga santo digdi sa kinaban

Sa porma nin tubig,

An dagat, salog,

Dawa an mga pasi nin uran sa mga masetas,

An dalagan na kansyon nin tubig an

Katuninungan

Na mas mapahinuhod sa bangui

Nin mga winalat nin agom buda karelasyon

Buda

Sa mga may pusong luho,

Dangugon ninda an saday na ugma

Sa luwas

Nin dai pigpipirot na bintana,

Pirit na pighihiling nin duwang marbol na dumog

An dumog sa harayo,

Pigdadangog an tubig,

Pigdadangog an lakaw nin saindang puso

Tanganing mahalat sinda nin daliwawa.

Kun maging mabuot an kinaban sakuya, gilayon

2009-06-16T03:57:00.001-07:00

Asi,

Buhay pa palan ako,

Maray na aga saimo kwarto,

Atyan mahilingan kita

Gilayon,

Kun an kinaban maging mabuot

Giraray

Sakuya.

Paranoia sa paghiling ko na muya mong magbalos

2009-06-15T17:03:00.000-07:00

Kaapil ko an tagiti

Ta tatawan niya akong malipot na daplos,

Ta ini man an muya mo,

An mag-uli akong solo,

Mag-senting bua,

An magkahilang ako,

Ini an muya mo

Ta sa huna mo pirmi takang pigkukulugan.

Ta padaba mo ako

2009-06-15T16:42:00.001-07:00

Tinapok mo an tada kong serbesa

Sa mga masetas

Ta habo mo akong mag-inom,

Muya mo pa akong makaiba nin haloy,

Ahh...

Nabuyong ako saimong pagkamoot,

Bago kita maglaog sa harong,

An mga piglason tang mga masetas

Pigguyod ako nin saro pang hiling,

Nagbabarayle an saindang mga kolor

Sakuyang mga mata na nagpupuon madumog.

Ghrufhso9tje9slo875

2009-06-12T21:11:00.001-07:00

Mas maurag an Rash sa Krear Bathala

Mas maurag an Haunted Garage sa The Doldrums

Mas maurag an The Doldrums sa Zero Toleranz

Mas maurag an Zero Toleranz sa Albay Rappers Club

Mas maurag an Albay Rappers Club sa Stolen Shots

Mas maurag an Stolen Shots sa Legalize Cannabiz

Mas maurag an Legalize Cannabiz sa Negative 13^th X-Ray

Mas maurag an Negative 13^th X-ray sa Pepsi Paloma Experiment

Mas maurag an Pepsi Paloma Experiment sa Haunted Garage

Mas maurag an Krear Bathala sa Haunted Garage

Ilusyon nin sarong X-god pagbaba sa white light

2009-06-12T10:26:00.001-07:00

Sa huna ko diyos ako,

Kan nagsuriyaw an ngipon ko sa kulog

Na dai masabutan nin sakuyang mga nagimatang mga ugat

Na nangadyi ki uran sa tahaw nin daplos.

Daing maginibo an gabos,

An paulok nin pamilya,

An Colgate,

An tubig na may asin na pigmulmog,

An Lotus Position,

Daing palabas sa TV o kanta sa radyo

Na pwedeng bulong sa muyang magadan,

Daing maginibo akong kaitong poon,

Palibot-libot…

Sa tahaw nin puso

Naghahalat ki simbag sa mga nata,

Mantang pighihiling-hiling an nag-iitom na mga dampog,

Muyang mahiling an nasa balyo nin alopoop,

An harong nin mahaling bangraw.

Maitumunong Bangui Sa Legazpi

2009-06-11T02:54:00.000-07:00

Maitom pa sa itom

An kurab na sakuyang namate

Kan nawaran nin kuryente

Sa bilog na Legazpi,

Pauling Tabaco

Sa makagadan na alas-diyes,

Haluyon an bus buda filcab,

Marang dalan an sakuyang halunan.

An kolor nin mundo,

Mamunduon,

Daing mga bitoon,

Garo nagdalagan an sakuyang puso sa tinampo;

Nasusulong kalibangbang.

May mga kaiba naman akong diklom lamang an nakakabisto,

Dangugon saindang hinangos sa silensyong batingaw

Na luway-luway na nagkakaon sakuyang paglaom,

Muya ko sindang kahurunon,

Pero nawawara ako

Ta pigsisiba ako nin kurab.

Sigarilyo

Kuta

Tanganing may pagkot

Pero nadangog ko an sakuyang agom

Na naghahadit.

Tigsik

2009-06-10T22:42:00.000-07:00

Tigsik ko an honesto kong sadiri ko na nagtaram

Na mas importante an kwarta sa rawitdawit,

Kaipuhang mainot an tulak,

An pagsalbar sa mga plato

sa dagit nin sakuyang mag-ina...

Mas makaugmahon an ngirit na pwedeng itao nin mga padaba.

Piggasod ko an sakuyang puso na nagbutog sa dagit

Ta an sakuyang bulawang oras para sa pamilya

Muya ko pa nanggad

Salidahan ki mga metapora,

Makasadiri, makasadiri...

Mahalnason an kwarta sa kamot buda

Sa bulsa na daing istorya,

Sa malilipot na bulan

Sepia an kolor nin harong,

Pero diputa an literatura

Daing maginibo an sakuyang arkitektong kamot na epileptik,

Kaipuhan niyang magbayle

Pag an musa nag-aabot.

Dipisil pag nag-iiwal an mag-agom,

Pag an aki naghihibi,

Pag namamate an taggutom na pwedeng magrani,

Pero an kaugmahan

Mas dipisil gadanon.

Pagkamundag -- Pagkagadan

2009-06-10T16:36:00.000-07:00

Kagadanan an naghahalat saimo Krishna,

Kan pig-aki ka,

Duman dadarahon nin paros an saimong lawas,

An satuyang ati,

Na garo lumaong bado na kaipuhan walaton,

Sana dai mo ito pagkaputan pag kaipuhan mo nang maghali

Ta magigisi, mas mararaot, mas dipisil maghali

Digdi sa dagang dai ta bisto

Dawa haluyon na kita digdi.

Pigdadangog ko na an kansyon nin kautsanan,

Iyo man sana an pangadyi ko para saimo,

An maaraman mo,

Na dangugon mo

Na an satuyang harong bako digdi sa daga.

Pag-abot nin bangui

2009-06-10T15:23:00.000-07:00

Kan nangiturog an magabat na aldaw,

An mga batak-batak na tulang muyang magsugpon,

Pasil na sana an pagdalagan nin hayahay sa daghan

Na kasubago garo bulod na magigiba nin kamao nin paros.

Muya kong maghigda sa malumoy na langitnon,

Alagad kaipuhan nin mga platong mahugasan,

An kwarto masamudan,

Kaipuhan man magkarigos,

Magsurat ki mga gigibuhon sa aga,

Kaipuhan magsurat ki rawitdawit,

Pangangaipuhan an pag-inom ki mainit na gatas,

Tanganing kumugos an pangiturugan,

Pwede an pag pagal na si padaba

Para sa mga istorya.

Pero dipisil malikayan na dai mag-isip pagkahigda,

Dipisil manduhan an isip na isarado an pinto sa kurab,

Kun magigibo kong dai mag-isip, maugma,

Dawa apudon akong duwag,

Alagad kaipuhan mag-isip ta igwa na akong pamilya

Dawa makatakot ta pwedeng matanga na mangaturog.

Ilusyon nindo nin ayam

2009-06-10T14:52:00.000-07:00

Aram nin ayam na ayam siya,

Aram niya gwapo siya

Kaya garo pag pighiling mo siya sa mata

Nauuyam siya

Ta nawawara an saiyang ilusyon.

Ika, iyo man,

Sa hiling mo mas gwapo ka sa ayam,

Pirmi an saimong pagsalming,

Baad kaya mo ito piggigibo

Ta dipisil mawara sa ilusyon.

Tigsik

2009-06-02T20:54:00.000-07:00

Tinigsik taka tsaa

Ta pigparumdom mo sakuya

Na an tawo nagagadan.

Bago ka maghali, padaba

2009-06-02T20:38:00.000-07:00

Kun magkahilang ka,

Magkakahilang ka, kita,

Dai kita makakadalagan sa maabot,

Pag nagkahilang ka padaba,

Pag may namamatean ka,

Taramon mo sakuya an makabasag pusong falsetto

Nin saimong tulang buda dugo

Na barado ki aserong kurab,

Dai mo pag-isipon an kulog na maapod sakuya

Sa mga banguing kaipuhan ko sindang kahurunon,

Kaya kong humampang saindang kaito ko pa bisto.

Dai ko hahanapon an bulong sa tubig, sa paros na dai makaputan,

Dai akong magiginibo

Dawa maubos an sakuyang daplos,

Dawa magmara an sakuyang dugo,

Sakuyang maugmang pagbalo

Na an sakuyang nakuang uli,

Dismaya.

Saro man sana an kaipuhan ta,

An marumduman si Krishna, si Jehovah…

Dai kita an satuyang lawas,

Dai kita an isip,

Gabos digdi, garo sana subo,

Padaba,

Ini an sakuyang patotoo na padaba taka,

Kun magibo kong marumduman mo Siya

Pag namate mo na an harani…

Maugma ako na namidbitan taka sa buhay na ini,

Saro kang burak na nagwalat ki hamot nin pahinuhod

Sa puso kong sagkod ngunyan

Estudyante nin pagkamoot.

Dai ini Masasabutan nin Sarong Manrarawitdawit pag Pigtaram Mo Saiya:

2009-06-01T04:51:00.000-07:00

Lapaon man an gibo mo boi!

Pero dai mo ito matataram saiya ta dai kang sugok,

Kaya ini na sana an saimong matataram:

Maurag.

Hahaputon ka niya:

Nata?

Dai niya masasabutan an simbag,

Kaya gilayon tataramon mo saiya:

Maurag!

Kisses, An One Sided Love Affair, The X, and True Love

2009-06-01T04:41:00.000-07:00

Padaba ko an kape,

Oro-aldaw

Naghahadukan kami,

Pagkapahiwak,

Siya an sakuyang pigduduman,

Masiram

An samuyang pag-iibahan,

Sagkod…

Sarong aldaw,

Basta na sana

Pigkulugan niya an sakuyang puso.

Pero padaba ko pa man siya,

Kaipuhan ko sanang hilingon

Puropirmi

An sakuyang X,

Si H2O.

Baad kaipuhan na man marumduman,

Kun sisay an tunay na nagpapadaba sakuya.

Saro Ining Rawitdawit

2009-06-01T04:07:00.000-07:00

Ha?

Iyo?

Nata?

Tanganing?

Inda!

Basta…

Bang Bang!

2009-05-31T16:52:00.001-07:00

Sarong badil an pagkamoot

Kun dai mo kayang kaputan,

Bang bang!

Saimong payo,

Bang bang!

Sa puso mo naman.

.45 sa iba,

Sa iba M16,

Shotgun an sakuya.

Bang bang!

Pwede man kitang makagadan

Ki sarong tawo,

Duwang tawo,

Tulo…

An bilog na kinaban

Pwedeng magadan

Kun madangog an satuyang istorya

Na musika

Pero asi,

Pwe!

Ribok man lang palan.

Botika

2009-05-31T07:24:00.001-07:00

Pigkakahuron ninda ako na magpakaray,

Dai ko daa muna walaton an sakuyang lawas,

Nadadangog ko sa paros an hinangos nin mga masetas,

Dawa su mga bayong,

Sa paghiro nin mga alang na dahon

Buda mga baybay,

An tingog nin dagat

Gabos sinda nagtataram

Na may bulong an gabos na hilang.

Bulong sakuyang magagabat

Na dalagan

Sa daga,

Sa gapo

Sa awot na dumog

An saindang mga kansyon.

Pigdadangog nin sakuyang puso

An sakuyang pag-abo,

Nakakaukod...

Dangugon an pangadyi

Nin mga ayam,

Namamatean ko

Saindang mga mata na nakadukot sakuyang naglalakaw,

An sakuyang mga bitis

Magian,

Dawa an sakuyang puso magabat,

Libreng bulong

Pag kaiba ko sinda

Sa panahon na an sakuyang anino dai ko bisto,

Dai ako pigkukurab

Ta an sakuyang mga kairibanan tunay.

May mga banguing pigkukugos ko an amnesia

2009-05-29T16:39:00.001-07:00

Mara na an ugma,

Aldaw, yaon ka na palan,

Kaipuhan nang maghiro,

Mga burak,

Mga ayam, hello,

Kaipuhang magkarigos,

Pamahaw atyan na,

Kaipuhang maglaog

Bago mag-8 nin aga,

Kaipuhan,

Kuta, atyan, pag-uli ko,

Pagkakaon,

Pagkahiwak,

Sa sakuyang pagdalagan

Sa hararom,

An sakuyang tulang kuta masugpon,

An salog sakuyang puso matuninong,

An daga giraray madumog

Tanganing may kusog pagkamata.

Langit an Asukar

2009-05-28T16:51:00.000-07:00

Nagdadalagan an mga tanga

Sakuyang bitis

Pasakat

Sa tahaw nin sakuyang kamot

Kun sain an saindang mga kairibanan

naglalangoy

Sa bulod nin asukar,

Dai sindang talenga

sakuyang pangadyi

Na piglalamos

Nin kulog nin buot,

Daing kusog an diabetes

sa itom nindang dugo.

Sakuyang mga muro

Nakahiling sa mga dampog

Na an gabat nin itom

Buminagsak sa mga saday nindang payo,

Piglaog saindang alimantak

Na naghahanap ki ugma.

Sakuyang mga kamot dawa sa harayo

Mapaparong an hamis,

Sa mas harayo

Mga baranggay nin tanga

Nagdadalagan

Naggagasudan.

Sa mas harayo,

may mga tangang naghahanap

ki mas mahamis na bulod nin asukar.

29,

2009-05-27T22:23:00.000-07:00

Na palan ako

Kasuhapon,

Dai ko namalisyahan

Ta dakulon an handa,

An mga nakarumdom.

Pig-iwasan ko

An nagruruluwasang mga hapot,

Makaskas sinda,

Nasukol ninda ako sa bangui

Paghali nin mga mauugmang anino.

Kagadanan,

Yaon na ako,

Maugma,

Ta dai akong magiginibo,

Kaipuhang rumdumon oro-aldaw

An nagraraning pagkautsan.

Maugma sa pagkaaram sa katotoohan.

29,

Garo balisong,

Kurab sa halunan

Sa mga masunod na numero.

Salming kan Sakuyang Ataul

2009-05-25T07:40:00.001-07:00

Muya kong pirming makarumdom

Kaya sa ward ako nagduduman

Duman sa Provincial,

Duman kun sain lambang aldaw may nagagadan,

May madadangog akong mga hibi,

May mamamate akong dumog sakuyang puso,

Sa pag-agi nin pamilya bulig-bulig an malipot na lawas

Na nakapatos sa tamong,

Rumdom ko an mga hapot na may lyabe,

Pano kun an barkada o pamilya ko an masunod?

Ayos sa ward ta dakul an makakahiling sa pasyente

Kun bigla an paghaldat nin paros sa puso,

Duman dakul an istoryahan,

Iyo sana,

Gabos mamunduon an sakuyang nadadangog,

Pero maray na ini

Sa mga kwentuhang friendster, Multiply, girlfriend buda boyfriend,

Elibs ako sa Radio Active Sago Project

Sa kanta ninda na,

“Marami ng nagugutom sa mundo, fashionista ka pa rin,”

Buda dakul na an nagagadan sa mundo,

Sex, drugs and rock and roll an piggagasod ta.

An makulog,

Pagluwas sa ospital,

Pagluwas digdi sa ward,

Malilingawan na an mga hibi,

An pandok kan mga nawalat,

An parat nin katotoohan

Ta maliwanagon sa mall,

Magagayon su mga babayi,

Su mga bado na muyang bakalon,

Garo sinda mga totoo, na dai sasalidahan,

Itatapok sana sa hudyan,

Kaya sige sana,

Kun makalingaw,

Madigdi na sana ako gilayon (Kahirak man),

Sa ward,

Tanganing maghiling, makimate,

Ta masiramon an mga pagkaon sa private,

Dai ko mahihiling duman an salming kan sakuyang ataul.

Sarong pagkamoot sa medyo harayo

2009-05-22T04:39:00.000-07:00

Krishna, aki ko,

Pigsisipon ako

Kaya garo ka mahamot na burak

Na dai pwedeng parungon

Nin sakuyang dungo na naghihibi

Ta naparayo sa pigmomootan,

Dai mo pagisipon na harayo

An sakuyang pagpapadaba,

Kaipuhan pano

Ta baad ika maluyos,

Saimong pagkaalang,

An puso ko iyo man.

Kaya sa pisngi na sana

Buda sa angog mong dapluson

Kun dai ko na mapugulan,

Sa liog mong mapuluton

Kun an kalintura nin pungaw magsangsang,

Makukuryente an saimong ulok

Sakuyang hinangos,

Na magpapakaray sakuyang pagmate.

Ako buda an Lamok

2009-05-21T16:59:00.000-07:00

Kun may ngipon ka lamok,

Kakaunon mo ba ako?

Pirang aldaw bago mo ako mahahali digdi?

Lamok,

Kun muya takang kaunon,

Kakahurunon mo pa ako baya?

…Dipisil magkaturog,

Kun dai mo aram an silensyo, an tuninong,

Maghali ka na.

Pangiturugan

2009-05-21T16:12:00.001-07:00

Buligon mo ako paduman sa pinakairarom,

Kun sain dai ko madadangog ko an gabos na kulog,

Na pigbabalangibog kan libong

Na dai ko namalisyahang nag-abot.

Sa pagtamuyaw ko saimo ina

Sa kasalan

Na ako an may gibo,

Sa pagkabuyong ko sa haldat

May lamok na muyang makihuron

An ulok hali sa Hades.

An ulunan, gapas mong kamot ina sakuyang payo,

Tamong, saimong mga braso,

An paros sa bangui, saimong tingog,

Pangiturugan,

Darahon mo ako kun sain dai ko maiisip,

Na pwedeng sa pagkamata

Dai na siya,

Pwede ito,

Kun siya an mainot.

An parong na dipisil malikayan

2009-05-12T04:56:00.001-07:00

Kuta tulong beses akong makarigos

Sa sarong aldaw

Tanganing mas malinig,

Mas harani sa langit.

Nagibo ko pagkamata,

Alas-5,

Bago magmata an panbulang,

Nagibo ko sa daplusong alas-3,

Pagkabangui...

Alas-9,

Sakuyang tulang puti,

Nag-aaso sa pagkabatak,

Dai man ako masyadong mapulot

Pero may parong sa kwarto

Na dipisil malikayan.

Sa dagat, sain pa ba?

2009-05-07T18:00:00.000-07:00

Dagat, ika na naman,

Sain pa ba ako madalagan?

Dakul an nagpapadaba sakuya

Pero daing pagkamoot sakuyang puso,

Nagtitios akong mahigda saimong baybay

Na garo mga diyamente,

An saldang kan aldaw, buhok kan babaying minumoot,

An saimong parong

Sanribong burak,

Sanribong simbag,

Katuninungan nin sakuyang daghan

An saimong mga hukol,

An saimong lipot sakuyang bitis,

Init sagkod maisipan kong mag-uli.

Muya ko sana

2009-05-07T07:56:00.001-07:00

Dai man akong naiisip taramon,

Muya ko sanang magsurat.

Makaugmahon

2009-05-06T17:04:00.000-07:00

Sa terminal nin bus

Kun sain an mga parahalat ki ugma,

Napangirit

Sa mga bulang

Hali sa kawatan na piglalaag sa ngimot

Nin mga aking nagdadalagan sa hinang,

Napauntok an kagadanan ki pirang minuto,

Dawa pirang minuto sana,

Mate an ugma.

Mga bulawang daplos

Saindang angog,

Saindang liog,

An paros

Naggagasod:

Sige sana, buhay ipadagos!

Biyahe sa probinsiya

2009-05-06T06:48:00.000-07:00

Dakul na sasakyan sa kalsada

An saiyang iwas dai na makahangos,

Sa aso,

Sa daplos,

Sa matarom na paghiling ki lambang saro,

Sa lambang saro,

May mga babayi, mga gurang na nakatindog sa bus,

Dakul akong kaiba pero dai akong kahuron,

Minataram an sakuyang isip dawa dai ko pigkakahuron,

Mga paril sinda sakuyang isip na minabalda,

Mga paril hali sa pinakahararom kong kurab,

Mga hapot na nakahiling sa daga.

Pigdadaplos an mga awto sa paghahalat ki berdeng ilaw,

Dakulong mga tawo pighahabol an oras na magadan sainda,

Sa hudyan,

Makaskas an layog nin mapulot na paros sa siyudad,

Baad sa ati ako magadan,

Baad sa buyong na makasabatan,

Pwede man sa sarong aksidente,

Atyan,

Dai ko man talaga aram kun nuarin

Magiging pula an berde,

O an berde magiging pula.

Sana pirming arog nin biyahe sa probinsiya,

An dalagan nin sakuyang isip,

Daing masyadong hapot

Na malugad sakuya,

Na matao ki kulog sagkod an pagal na gabos

Mahigda sa malumoy na kutson.

Sa biyaheng probinsiya,

Mga simbag an sakuyang nakakasabatan

Sa biyahe kun sain dawa halaba,

Tuninong,

Arog kan mga dahon,

Arog kan bulod,

Arog kan bulawang naaagihan,

Pasil masabutan,

Arog kan Mayon na maski nag-aaso,

Tuninong.

Sakuyang pagkagadan

2009-05-01T05:09:00.000-07:00

Habo kong magadan

na dumog an dalan,

kun pupuwede daing luha na magtagdo

sa daga na dai makakahangos,

magabat an mga bitis na libong na naglalakaw,

an tipsik nin dugi,

sa bado,

sa puso,

an mga pandok, mga molaveng dampog,

su mga istorya manungod sakuya

habo kong madangog ta dai ito totoo,

dai nindo ako gibuhong diyos tanganing marumduman,

may makanta,

may marawitdawit,

magayon,

maugma ako,

pero dai na sana,

daing lugaw,

kapeng malipot man sana,

dai kamo magtao ki burak,

ta daing hamot an makakahali nin mundo,

kun muya nindo akong mapaugma,

suluon nindo an sakuyang lawas,

an sakuyang abo, dai mo ipahiling sainda padaba,

tanganing dai sindang dudumanon,

kun marurumduman nindo ako,

makaumahon baya?

Kun marurumduman nindo ako,

Sana marumduman nindo na kayo man magagadan.

Kun pupuwede sana,

May aldaw

Pag naghali ako,

Pwedeng may paros

Basta mainit,

Ta an gabos pwedeng mautsan

Pag namate an lipot.

Habo kong magadan

Na dai kamo handa,

Padaba...

Ika na an bahala.

Kuta, dai na mangulog an mga namomoot

2009-04-30T18:22:00.001-07:00

Dai na taka padaba,

Dagit ako saimo,

Muya takang bungagon

Pag namamate ko an saimong halangkaw,

Ulod sana ako na naghihiling saimong paglayog,

An saimong moral, bayong sa mga alopoop

Na sakuyang pagtangad, nabubuta ako

Saimong liwanag.

Habo ko na saimo,

Mapiot na dalan

An sakuyang halunan sa mga gamit mo,

Pangangaipuhan an espasyo,

Maghali ka na,

Kaiba an saimong silag.

Nagtutubod ka ba

Padaba?

Taramon mo sakuya,

Nagtutubod ka ba sa sarong

Sadista,

Stanilista,

Nagtutubod ka ba

Na igwang sadiring dila an sakuyang kulog?

Haloy na panahon na an pighahalat nin pintuan,

Yaon ka pa.

Dawa sarong bulan na akong dai nagluluwas ki chi

2009-04-30T17:34:00.001-07:00

May mga bangui,

Pag nahihiling ko an bilog na bulan,

Garo mauran ki daplos,

Dawa maparos.

Tawo sana,

Taramon na may lugad,

Tawo sana,

Na nadadaog nin sibulyas, bawang

Na nag-aagos

Sakuyang nagsusubong dugo,

Naggigibong hukol,

Piglalamos sakuyang katanosan.

Tawo sana

Na pigwawalat nin kusog

Pag napaparong an hamot

Na naggagadan ki kalag.

Tawo sana,

Iyo,

Nagkakarigos na ako sa lugad

Sa paotro-otrong taramon.

Sakuyang Paggurang

2009-04-29T18:08:00.001-07:00

Habo kong maggurang na nakahiling sa luwas

Kan bintanang dumog,

Naghahalat

Na mapagal an uran sa paglamos sa daga,

Na sa sakuyang puso, iyo man,

Habo kong maherak sakuyang sadiri,

Daing igos na maglakaw sa pier,

Sa dagat,

An hukol garo matabon sakuya,

Pighahali nin mundo an kusog nin bitis,

Naghahalat na maging magian an lumba-lumba,

Naghahalat na maghali an gabat.

Habo ko man na pirming maglakaw sa dagat

Pigpapabayaan an mga nakaagi na maglakaw parani,

Pighihiling an mga aking nagkakawat sa pier,

An bulawang nagbababang aldaw

Mahihiling saindang naghihirong mga mata.

Sakuyang paggurang dakul akong oras para magtukaw,

Isipon an mga manungod sa hararom,

Maduduman ko an mga nakaagi,

Su mga mahamis na aldaw, na bulan,

Garo si Peter Pan kaipuhan ko itong isipon

Tanganing makalayog,

Pero dai,

Gagamiton ko an sakuyang oras tanganing isipon

Kun sain ako paduman,

Kun sain ako maduman

Pag lumang bado na an sakuyang lawas

Na kaipuhan kong salidahan,

Itapok,

Kaipuhang magpreperar,

Kaipuhang dai na ako ipangaki giraray.

Habo ko na mamundag gilayon sa kinaban nin kirot,

Na tubuan ki kulog sa gilagid,

Makaiwal an mga barkada

Na garo nagtanom ki paroy

Na rarauton sana ki alimagyo,

Habo ko na mamuot

Kun sain mamamatean ko na sana

Na dai na akong puso,

Habo ko na magadanan,

Na an dagit magistar sakuyang daghan,

Kun sain pwede akong makagadan.

Sakuyang paggurang,

Saro sana,

Saro sana…

An pirmi Siyang marumduman.

Para sa mga tanga

2009-04-29T10:40:00.000-07:00

Dakula an sakuyang dagit

Sa saday nindong lawas

Kan nagtugdok kamo

Nin mga pulang bulkan na nagkakalayo

Sa kublit nin nagkakaturog

Na umboy na kan naghibi

Nasulo an sakuyang daghan sa dagit,

Muya ko kamong buhusan ki gasolina,

Muya ko kamong durugon saro-saro,

Ah kun dai sana nindo aram an saindong piggigibo.

Kan banguing buyong si Amatesa

2009-04-28T18:31:00.000-07:00

Mga gapo sana an mga bitoon,

Nata ko sinda papadabaon?

Simbag mo sakuya sa pagbasa ko nin Neruda.

Rumdom ko an saimong mga taramon

Kan pigsalbar ka nin parong nin Ginebra,

Rumdom ko an saimong pandok

Kun sain nadangog ko an hukol nin dagat,

Tamuyaw nin alimagyo na piglamos an sakuyang puso

Sa banguing saimong namamate na ika sana,

Ika sana saimong buhay,

May mga kaiba ka sa pagtagay,

Pero saimong pag-uli, paglaog sa kwarto, aram mo ika sana.

Iyo,

Kaya mo pa an gabat nin saimong payo,

Diresto pa an lakaw nin saimong mga bitis,

Nakakahuron mo pa an liwanag hali sa mga dyipni,

Pero dai pwedeng dai ka magtangad sa mga kagayunan sa diklom,

Dai pwede,

Ta duman ka hali,

Kita,

Aram ta an.

Pag nag-aabot an uran kun nuarin pahali na ako

2009-04-28T04:39:00.000-07:00

Pag nag-aabot an uran kun nuarin pahali na ako

Paduman maski sain,

Tanganing iwalat an sakuyang pungaw,

Garo ako sasakyan na daing dalan na dudumanon,

Mahalat na matuninong an atop,

Mahalat na maghali an mga hapot,

An mga masetas maugmahon baya?

An mga bayong sa malipot na mga dahon, kamusta?

An mga ayam, dai sinda pwedeng maglaog sa harong

Ta an mundo magabat kun an salog madumog.

Pwede man magdara ki payong,

Pwede man magkalo,

Muya kong kahurunon an sakuyang makakataning sa bus,

Minsan habo kong magbaba pag-abot sa terminal,

Malunad na sana pabalik sa tighalian,

Mas mamunduon kun dai na ako magbuhat

Kun habo maghali an uran,

Sa dalan na sana nin pangiturugan maduman,

Baka lamang sakuyang pagmata,

Pwede na akong maglakaw

Tanganing walaton an makautsang girumdom kan naghali.

Iyo, yaon ka digdi kaito

2009-04-27T05:38:00.001-07:00

Iyo, yaon ka digdi kaito,

Pigbalaybay mo pa ngani an satuyang mga bado,

Pigkaagan mong namit an mga aldaw,

Hinangos ta an ulunan ta sa tahaw,

Pigtaram ko saimo na garo sana kita mga transient

Na nakaistar digdi,

An aram mo sana muya mo akong makaiba,

Dai mo nadangog an sakuyang kurab,

Na gabos pwedeng mautsan sa sarong pagpiyong,

Kaya, sige,

Darahon mo an saimong tamong digdi sakuyang laog,

Pigtaram saimo ki sakuyang mga abagang nanluluya.

Ngunyan mahapot ka kun yaon ka ba digdi kaito,

Iyo,

Pigtataram ko saimo,

Pigpaparumdom,

Na mas makusog an namit nin pait sa hamis,

Gabos,

Gabos na porselanang platong pighugasan malilingawan ta

Sa pagkabasag ki sarong melamine na baso,

Iyo,

Yaon ka digdi,

Kaito,

Maski ngunyan,

Kun marurumduman mo kuta.

Pag dakul an sakuyang pigkakan

2009-04-25T19:09:00.000-07:00

Pag dakul an sakuyang pigkakan,

Mamunduhon ako,

Kaipuhan kayang may piggigibo ako,

Ta pag nagpahingalo ako,

An sakuyang puso buda isip,

Sige an dalagan,

Garo sinda mga makina

Na igwang burabod nin gasolina,

Dai sinda mapondo,

Ta aram ninda na pag sinda nagpondo,

Mabubutasan sinda sa sarong luho.

Sa pag-agi nin mga taon, Krishna

2009-04-21T06:00:00.001-07:00

Sa ngunyan Krishna,

Mantang kaya pang kupuon nin sakuyang daghan

An saimong sadit na lawas,

Saimo an sakuyang kusog, daplos, dugo,

Aalingon taka na garo pagkamoot ko sa sakuyang sadiri,

Kugos-kugos ka nin sakuyang panahon,

Pag-abot mo nin edad 5 sagkod 15,

Papadumanon ta sa alopoop an satuyang mga buradol,

Kahurohunlakan ta an paros, mga bayong,

mga ayam, an mga awot, dawa mga tanga,

Tataramon ko saimo kun nata gabos na tao

Gigibuhon gabos tanganing maglayog,

Kun nata gabos magibong hagyan

Tanganing maabot an aldaw.

Pwede kang magduman sa manlaen-laen na planeta, Krishna

May pangakong ugma an kusog, dunong, an estado sa buhay,

Pwede ka man maghali saimong lawas,

Na wawalaton mo man sana pag ika nagadan,

Sana maaraman mo na dai mo makakaptan an liwanag

Kun dai mo ito mapahinuhod,

Na magigibo mo kun an saimong labi nakadukot sa daga.

Pero Krishna, pwedeng mag-makopa an saimong kamot

Pag may ginibo kang sala,

Ladang patos nin sadiring liwoy

An sakuyang puso pag piggibo ko ito,

Pero kaipuhan padaba dawa makulog sakuya.

Sa pag-abot mo nin 16 na taon,

Marabas kita, ako kaiba ka sakuyang soltero, barkada,

Mapitas kitang mga burak puropirmi para itao ki Gugurang,

Maduman kita sa pinaghalian nin saimong pangaran,

Ipamimidbid ko Siya saimo,

Saiya, mas masisimbag an saimong mga hapot.

Kun hanapon mo an saimong pangaran

Bago ka mag-abot sa edad na 16,

Krishna, dai na akong maipapangadyi sakuyang pagtangad.

Kun pupuwede ngani,

maring arog ka ni Prhalad Maharaj,

Krishna, dawa ano ka,

dawa ika si Hiranyaksshipu,

Padaba taka...

Jaya Lord Nrshimhadev!

Baybay

2009-04-20T17:23:00.001-07:00

Masiramon maghigda sa baybay ta hali sinda

Sa narunot na mga lawas

Kan maghali an karapsaw nin gios.

May tali an paghigda sa dagat ta madigdi ako sa hudyan,

Dai malilikayan an padudumanan

Nin sakuyang pisikal,

Na dudurugon nin takla na itatao nin panahon,

Pirming madudumog an sakuyang wawalaton,

Na maiba sa mga bitoon sa daga na nalalamos sa pagkamoot,

Sa salidahan nin diklom buda liwanag.

Ako,

Dai ko aram kun pasain ako

Pag pigwalat ko na an sakuyang karne…

Sa ngunyan maati an sakuyang agimadmad,

Sana malinigan ko an sakuyang puso sa buhay na ini.

Muya ko na igwang baybay sakuyang dudumanon,

Dawa baybay ako sa masunod kong hinangos,

Baybay sa Vrindavhan

Na hihigdaan nin mga baka, kaiba ninda

Krishna buda Radharani.

Pag nag-iwal an mag-agom

2009-04-19T19:29:00.001-07:00

Kaipuhan daang maging maiwas an kwarto

Pag nag-iwal an mag-agom,

Tanganing makahiro an paros sa daghan.

Mababawasan ki magkapirang bado an satuyang aparador,

Diit sana an hugasan sa lababo,

May rason ako para dai magkakan,

Pwede akong magpaligid-ligid sa kutson pag parong tsiko,

Maglakaw sagkod muya ko sa bangui,

Dumanon an gabos na dagat sa Tiwi, Bacacay, Sto. Domingo,

Magdalagan sa gabos na dumog sa madidiklom na parte

Nin satuyang mahukol na relasyon,

Maiwas an kwarto,

Sadiri ko an oras, pero dai ko siya mamamanduhan,

Dai ako masyadong makakahiro sa kinaban,

Ta nalibot ta na garo gabos na pasyalan digdi sa Legazpi, sa Albay,

Naduman ta na garo gabos na dagat na pwedeng dumanon

Ki mga dai makapaghalat na an duwa maging saro.

Sa pagbuntog ko sa askad,

Ika an dagat na makanta sakuya ki tuninong,

Kublit mo an baybay,

Buhok mo an paros na magpaparumdom sakuya

Na dai lang palan kwarto an magiging mapiot pag ika naghali.

Mga aki nin Paros

2009-04-19T05:40:00.000-07:00

Aki ako nin paros,

Kan ako joven pa,

Banal an sakuyang pagtubod,

Ta haluyon magkamang an mga aldaw

Sa kwadradong harong.

Sa pagdakula, nagtatalubo an mga muya sakuyang puso,

Muya kong magkakan sa madugiong plato nin mga parauma,

Muya kong mag-istar sa dagat, kahurunon an mga sira,

Magwalat ki gira sa baybay nin kinaban,

Muya kong dumanon an pitong kontinente,

Muya kong maaraman kun igwang pangwalo,

An gabos na eksperyensya ikwekwento ko saindo,

Ta naagihan, maaagihan nindo.

Maagom ako kun kaipuhan,

Pero mabubuhay ako dawa daing babayi sakuyang buhay,

Pigrerespeto ko an panahon,

Dai ako naghihidali,

Yaon sana an pagkamoot

Ta nasa puso.

Maduman sakuya an mga ibang hagbayon

Sa pag-abo, paghalaba nin sakuyang buhok,

Mga aki sinda nin paros,

Mga tugang,

Saindo an sakuyang kugos,

Dadarahon sinda sakuya nin panahon tanganing maghapot,

An sakuyang simbag, bulos nin liwanag saindang lalawgon,

An sakuyang halabang buhay,

Pwedeng ikurit sa mga gapo, gibuhan ki libro,

Itukdo sa mga unibersidad nin puso.

Aki ako nin paros,

kaito.

Ngunyan,

Nakua ko an simbag

Na gabos na aki,

Mga aki nin paros,

Gabos muyang lakupon an kinaban,

Muya nin gabos na saindang tingog madangog,

Muya nin gabos na iwalat saindang gios.

Sa paggurang,

An sakuyang tingog nagluluya,

Pero mas nagkukusog an tali,

Ta nadadangog ko sa edad na ini

Na pigtataram nin paros

Na maski sain yaon sana siya,

Maski sain mauukudan ta an pagkamoot,

An paros sarong bayong na malayog satuyang mga kamot,

Mag-adal kitang magdangog.

Banzuela

2009-04-19T03:56:00.001-07:00

Banzuela,

Pigtaram mo sakuya

Na dai maabot an magayong rawitdawit

Sagkod

An sakuyang ngabil madumog nin pagkamoot,

Pero an pait kan pagsayuma nin pig-ilusyon pigsuka ko

Sa magkapirang berso

Na sa sakuyang namit mahamis,

Mahamis an pagbalos,

Mahamis an paglingaw.

Pero iyo,

Kan matanaan nin sakuyang labi an pagkamoot

Iyo man nanggad,

Garo tunog nin burak na maka-rungaw,

Garo mga bitoon sa bangui na may hamot an apod,

Banzuela,

Orgasmo an mahiling an sakuyang namamate sa papel

O sa monitor nin computer,

Orgasmo an mamatean na sakuyang mga kamot naghihiro,

Naghahaman ki sarong kagayunan.

Banzuela,

Pigtukdo mo sakuya

Na mga taramon na may apat na letra an pinakamakusog,

Na maabot an panahon na mauukudan kong maging simple,

Muya ko ito,

Nagtutubod ako saimo sa mga magkapirang bagay,

Banzuela,

Kamo daa ni Beljica an Pound buda Eliot kan Albay,

Pigtaram sakuya ni Borlagdan,

Nagiulok an pagsayuma nin mga Nagueño sakuyang pagistorya,

Pero dai akong labot,

Ta an saimong berdeng pluma,

Masupugong mga dahon na nakalakop saimo

Kun sain mga mapahinuhod sana an makakasabot.

Pwedeng sarong aldaw

2009-04-18T21:21:00.000-07:00

Pwedeng sarong aldaw,

Magrebelde an sakuyang isip,

Gadanon kaini an sakuyang puso,

Sa dagit tumimak…

An sakuyang mga kamot, pula, malansa,

Dugo an kolor nin kurab nin tigbabayong hapon

Na naghahapot kun nata dai ko nakontrol an sakuyang alimantak...

Garo may piggigibong pelikula, pighihiling ako nin mga tawo,

Mantang pigbubutong nin mga pulis paduman saindang awto,

Pwede.

Sarong aldaw pwedeng

Dai na ako magsurat ki rawitdawit,

Magpapabakal na sana ako ki badil arog ni Rimbaud...

Maduman man ako sa Juarez, Mexico,

Peregrinasyon sa mga banal na herenggilya,

Ibabalangibog na sana an pag-uli nin sakuyang lawas.

Pwedeng tatuan ko ki biyoleta

An abaga buda daghan nin sakuyang agom

Na pigpangako ko sa langit na ikagagadan ko kun sakuyang gigibuhon,

Pwedeng pagkamata an sakuyang dila, tulak, bulsa,

An mga inot kong iisipon,

Pwedeng dai na akong ibang kabisto maliban sa sadiri ko.

Sarong aldaw pwede man

Na magpakalbo ako,

Mag-istar sa bulod,

Suysuyon an dalan ni Samuel,

Buligon an mga pigdara ni Kristo,

Pwede.

Babayi

2009-04-18T16:10:00.001-07:00

Kaipuhan ba talaga

Na magkarigos ka ki pahamot?

Dakul akong kabisto na garo ayam mo sindang pigguguyod

Sa pag-agi mo,

Naparong ko an pigwalat mong hamot

Na nagtaong mga kamot sa paros

Na an mga muro, nagarik-arik na mga burak na

Nagdadalagan samuyang mga lawas,

Nahiling ko an liwoy nindang mapulot

na nagbabayle saindang dila

Saindang maalindukong pagtaram,

Garo muya ka nindang kaunon,

Kakaunon ka ninda pero dai ka mauubos.

Babayi,

Kalampunay ka sa tore ni adan,

Daing matibay na paril nin harong,

Daog mo pa an alimagyo, linog

Pag ika minalaog sa sarong relasyon

Na an korte magiging triangulong mundo.

Haling buhok sagkod bitis,

Dakul kang piglalaag,

Tanganing mamuyahan ka,

Aram mo an sikolohiya,

An kaluyaan nin mga adan,

Pero babayi,

Dai mo man taramon aram ko,

Kun ika an eba

Na nagsusulot na gare mahihiling an saimong perlas,

Ika an mas maluya,

Ta nasusulo ka nin sadiri mong init

Pag dai kang kataning na adan sa higdaan.

Nasa kamot nin puso nin may kagsadiri an kagayunan

2009-04-18T08:12:00.000-07:00

Nasa kamot nin puso nin may kagsadiri an kagayunan,

Bako mata an naghihiling,

Bako tenga an nagdadangog,

Nahiling ko an mga santo,

Inaagihan ka sana ninda Tabaco,

An saimong mga aki sa LCC na nagkakarigos sa kalayong daplos,

Mga aki nin aldaw na daing atop sa bangui,

Inaagihan sana ninda pero dai ninda nahihiling,

An mga gurangan mo Tabaco na nababatak an tulang

Sa lipot nin mga bitoon,

Magagadan garo sindang ayam,

Nangingimigkimig

Sa dalan mong naghihibi, daing maginibo,

Gabos bungog

Sa saindang pighihilang na mga batok.

Agom nin dagat an aldaw,

Saiya naguuli an mata nin kinaban,

Kun an aldaw an mata nin kinaban,

Kita naman an puso,

Sa bangui kun sain biyoleta an satuyang mga labi,

Maluwas an kolor nin gabos, itom...

May kaipuhang madangog an satuyang puso,

Kaipuhan magmuklat nin satuyang puso.

Parumdom nin Uran

2009-04-17T04:47:00.000-07:00

Dai na man akong ibang aram gibuhon pag nag-uran

Kun ako solo,

An lakawon an pigwalat nin langit na salming nin kalag,

An hilingon an mga mata nin mga makakasarabatan

Na garo paghiling ko an sakuyang mga nakapaipling mga taramon,

An hilingon an laog nin mga tintadong bintana

Nin mga sasakyan na luway-luway man an dalagan,

Naghaharok ako ki kusog sa paglakaw,

Naghahanap ki simbag sa mga tukawang winalat,

Sa mga napauntok sa mga mapagpadabang atop,

Sa mga mag-ilusyon na tunay na nagpapadaba sa uran,

Matukaw na sana ako pag napagal,

Duman kun sain madadangog ko an gabos,

Importante sakuya an mga panahon na ini,

An distansiya bulong sa puso,

Distansiya sa palibot, sa gabos na namamate,

Ika man padaba,

Kaipuhan mo ini,

Kaipuhan man ini nin satuyang mga padangat,

Bulong ini sa gabos,

Sa gabos na nagtutubod na an oras,

Na an gabos pagsadiri ta.

Bayong

2009-04-16T15:19:00.001-07:00

Regalo nin langit an mga bayong

Ta mamunduhon an satuyang buhay,

May kansyon sindang naglalayog na burak,

langit na aki nin biolin buda pyano,

Sa laog nin sakuyang kudal,

Pag nahihiling ko sinda,

Naglalakaw ako ki luway-luway,

Naghahangos ako ki luway-luway,

Sarong salog an sakuyang halunan,

Sakuyang daghan mga dakulaong gapo

Kun sain nakalunad ako sa bangka sa tahaw

Pighihiling an mga arteya kong mga masetas.

Nahihiling ko na sa pagkakan ninda sa kaunan nin mga ayam,

Garo sana sinda si Krishna na nagkukua ki mantikilya pag wara si Mother Yasoda…

Daing panahon na dai sinda nagtatao,

Dipisil magtubod na sa saday nindang lawas,

Nakua nindang maglayog dara-dara an dakula nindang puso.

Sa tabang nin mga naturalmenteng alak satuyang buhay,

Sindang mga kakawat nin mga burak, mga dahon buda paros

Sa mga aga buda sa mga tigbabayong hapon,

Buda sa gabos na panahon,

Nahiling nin satuyang puso an satuyang lawas,

Naghihidali na magdalagan parayo.

Sindang sakuyang pamilya pag bangui

2009-04-16T11:24:00.000-07:00

An bulan may kabanga,

Naparong ko an kagadanan sa pulang laad,

Habo kong marunot an puso nin sakuyang agom

Kaya nag-uli ako hali sa matanga,

Pighali nin sakuyang paghadit an sakuyang pagkabuyong

Ta nasuysoy ko an nagbabayleng dalan.

Pag-abot,

Turog an gabos,

Estatwa ako sa kusina,

Naghahalat na an pirot giraray mag-abot...

Nagdalagan an sarong kino sa may lababo,

Sarong ipis naglayog,

Tumimak sa takop nin kaldero nin maluto sa mesa,

Nakatukaw ako,

Naghahalat...

May butiki sa kisame,

Naghuhuron an mga lamok,

Pighihiling ko sana sinda,

Pigdadangog,

Sindang sakuyang pamilya pag bangui.

Padaba mare... ta sakuyang ikagagadan

2009-04-14T23:18:00.000-07:00

Sa mga aldaw

Na pighahalat nin sakuyang mga mata an diklom,

Tanganing duman magdalagan,

Tanganing makipaghilingan sa pangiturugan,

Na nagbubukod sakuya maski sain ako magduman,

Padaba,

Baka an paros magbara sakuyang halunan,

Kaya mare,

Taningon ako,

Kahurunon an paglanyag nin sakuyang daghan,

Paghurunan ta an pait,

Bago maghali an namit nin satuyang pamanggi.

Dipisil palayugon an ngirit na may magabat na pakpak,

Dipisil gibuhong higdaan an satuyang mga daghan na nagaarik-arik,

Daing maginibo an lipot tanganing kita magkasararo.

Dipisil...

Pero mas dipisil magkaturog

Na may pusong daing maginibo,

Nagkikiwang-kiwang.

Kaya padaba, mare,

Paghurunan ta an mga nakaagi,

Paghurunan ta an gabos,

Kun dai mo pa kayang magtaram,

Kugusi ako,

Maluwas na sana an mga tataramon,

An pag-sabot.

Happy Early Morning Poem

2009-04-14T16:47:00.000-07:00

Naglabar ako sa aldaw pagkamata,

Hello mga bayong

Hello mga burak

Hello mga ayam,

Gatas na mainit kasubanggi

Gatas na mainit pagkamata,

Mga sadit na Emerald sakuyang mga mata, maugma kong pighali,

Hello mga Chicoring panganuron,

Hello sa gabos na yaon

Pero dai ko kaipuhan ki kahuron,

Yaon pa ako digdi sa kinaban,

Dai ko aram kun pano magpasalamat.

Gatas sa bangui

2009-04-14T07:59:00.000-07:00

Gatas na mainit

Na may diit na asukar,

Garo pagkarigos sa dagat sa diklom

Pagkatapos mahigda sa baybay,

Gatas, nektar ka sa pagal na lawas

Buda sa pusong malungsi,

Ugma na naglaog sakuya an mapulot na hamis...

Puno akong haluyon sa paghalat sa pag-abot nin limpoy,

An naggabat kong payo

Naggibo ki kalot,

Pangiturugan, yaon na ako!

Gatas,

Protina ka para sakuyang agimadmad,

Pampakusog tanganing may laban sa mga Beelzebub na maabot

Sakuyang paglaog sa makangirabong dimensyon.

Narurumduman ko an saimong labi sa tsaa

2009-04-14T03:37:00.000-07:00

Narurumduman ko an saimong labi sa tsaa,

Saimong hadok

Rignos ako na naglayog,

Ahh, an pagkabilog kong liwat…

Saimong hadok

Nadadangog ko an sarong salog…

Maliban sa subo sakuyang dugo,
Magian ako sa pagwalat sakuyang lawas,
Maduman ako saimo,

Mantang nakatukaw sa luwas nin satuyang pintuan.

Habo mo na mag-inom ako ki kape pag naghali ka
Ta Stallion an dalagan nin sakuyang puso
Ta malipot an daghan
Nin paborito tang tukawan.

Para sa mga babaying dios

2009-04-13T08:25:00.001-07:00

Pag namumundo,

Naglalakaw ako na nakabitis,

Mas harani kaya sa daga,

Mas harani sa mga dahon na naparayo,

Duman sa limpoy sa higod

Pamilya ko an mga anino,

An mga gapong burak sakuyang tinitimak,

An paros na minaagi sakuyang mga bitis,

Sinda sakuyang kaugmahan,

An kulog sa puso nin sarong adan,

Kulog nin sakuyang puso,

Ako sinda,

Sinda ako,

Ta inagihan ko an dagat na tunok

Bago mailusyon an hamot.

Ako an daga,

Lawas ko an daga,

Sakuyang lawas kakaunon nin kinaban,

An sakuyang lawas maaki nin mga masetas,

Maabot… maabot,

Mga Rosas, mga Rosal, gabos na mahahamot,

Para sa mga Aphrodite na matutunaw pag pigsulo,

Sinda na tahaw nin ugma buda mundo.

Pag pighihiling nindo ako

2009-04-13T07:35:00.001-07:00

Pag pighihiling nindo ako

May panahon na dai ko kamo nahihiling

Ta harayuon ako,

Garo bitoon na yaon sana pero harayo.

Nagtataram iyo, nakikihuron iyo,

Pero an sakuyang puso, an sakuyang isip

Duman sa harayo,

Dai nindo aram kun sain ito.

Dai ako duman, digdi pag nagiisip ako,

Dakul akong pig-iisip,

Arog kan kun nuarin giraray ako magkakaigwang halabang oras

Na makakatukaw sa kwarto nin sakuyang mga hapot,

Minsan ko lang kaya ito magiginibo ta

Dakul na tawo sakuyang buhay, dakul na kamidbid

Garo mga rosas sa kudal na kaipuhang dumanon, kaipuhang parungon.

Pag pighihiling nindo ako,

Pighihiling ko kamo,

Pero dai kamo madagit

Kun nagpapalataw-lataw ako duman sa balyo nin mga alopoop

Mantang pigdadangog an saindong mga tingog.

Gabat

2009-04-13T05:18:00.000-07:00

Naggagabat an mundo pag naggugurang,

Mabuti matibay an reda nin sikad-sikad na sakuyang piglunadan,

Ta mababatak an daga

Sa gabat nin pigdadara,

An rebolusyon nin reda,

Tanog nin sakuyang puso,

Garo orasan,

Pig-aapod an rumirom na parani.

Pagduman sa sarong kaaldawan

Pigpalipot nin ice cream an sakuyang pusong patente,

Sa huna ko naka-eskapo na ako sa mundo

Kan dai ako nagtugot sa Matador,

Sa huna ko…

Dulce

2009-04-12T23:12:00.000-07:00

Bulong sa hilang nin puso, dulce,

An namit na batingaw sa dila,

Hamis na kaipuhan pag nalason,

Hamis na masiram kaiba sa paghahalat,

Ibog nin kulog sa daghan ninipis pag natanaan,

Ugmang pag tumimak sa dila,

Sa ngimot igwa kang daragang nagbabayle.

Dulce na kitik nin mga daraga,

Masiram an dulce na may mani,

May dulce na maurag tunawon sa dila arog kan tsokolate

Na pag naka-dakul, garo ka daa naka-patsi.

Pabayai an diabetes

Kun an puso nanganganaan sa kanser nin pungaw.

Dulce an kaiwal nin maalindukong korte nin lawas,

Pero dulce an muya nin mga babayi,

Dulce na habo nin mga Gabriella

Ta chauvinistang orig an mga lalaki,

Pero siisay sana an may kusog na mag-dae

Sa saday na siram na may dakulang pangako.

Manlaen-laen na baratilyo sa tindahan pag namumundo,

May taldes, molino, ube, macapuno,

Piso sana an presyo nin siram,

Halipot na ugma pero swabe.

Dulce an namit nin pagkamoot,

Pagkamoot na pigpatos nin asukar,

Ah dai sana kulugon,

Dai sana maging makasadiri

Ta sa tahaw nin dulce,

Askad an mahalat.

Radyo sa bangui

2009-04-12T23:10:00.000-07:00

Romantiko an magdangog sa radyo

Mantang solamente sa kwartong may mesang dumog,

Tipsy sa nagkapirang basyong pig-ibahan an sakuyang luho,

Igwang mga pocahontas sa may pier,

Igwa pang mga serbesang naghahalat sa may Tanglaw, sa may Lady Ann,

Igwa man akong mga Dylan, Pink Floyd, Marley, Beatles,

Alagad mas muya kong magdangog sa satellite nin radyo

Ta masiram pag dai ko aram an masunod na kanta,

Dai ko bisto an ala-una ki aga,

Lalo na an alas-dos buda masunod pa,

Baad may madangog na kanta hali sa inagihan nin puso.

May nagdadangog ki radyo sa mga tsipipay na hotel

Kun sain nagpaparahalat magpundo an uran,

May mga nagdadangog sa radyo mantang piggigibo an siram

Tanganing dai mamalisyahan an mga maluya nindang linog buda mga hinghing.

Radyo sa bangui na nagbabareta ki mga ginadan sa siyudad,

Ki ending sa PBA, ki mga bagong tsismis sa buhay ninda Piolo buda John Lloyd,

Radyo sa bangui na nagtataram ki mga bagong lista sa tubig nin gobyerno,

Radyo sa bangui na nagkakanta manungod sa naghaling agom ni Lolo,

Radyo sa bangui na kaiba mantang an pirot magkatok.

Igwa mang mga dai makasurat kun daing musika,

Na kaipuhan an radyo tanganing mag-abot an musa,

Igwang mas muya na igwang D.J,

Igwang mas muya an FM, su iba AM,

Manlaen-laen na rason, manlaen-laen na ugma,

Sakuya, importante an musika sa buhay;

Garo ito asin sa isira,

Radyo sa bangui pag nagsawa na sa sakuyang mga MP3s,

Radyo sa bangui na inspirasyon sa sarong naghangos na rawitdawit.

Kalachuchi

2009-04-12T23:03:00.000-07:00

Kalachuhci, kan naglaog an saimong hamot sakuyang dungo,

Dinuman kaini an sakuyang puso,

Nabuksanan an baul nin simbag,

Tunay na ika an burak ki gadan

Ta ika an kaipuhang hinangos

Nin mga pigdalaganan ki buhay.

Pag ika napaparong ko Kalachuchi,

An sakuyang dugo nag-aagos daing untok,

Salog an ugma

Kun sain pigtatao ko an sakuyang sadiri.

Maski ika nasa daga,

Maski ika luyos, alang,

An saimong parong langitnon,

Kaya dai pwedeng dai taka puruton pag naagihan,

ilaag sa bulsa,

Iuli sa harong,

Itao sa mga padaba.

Balani an saimong gayon,

Musa ka nin pantiyon,

Hamot nin mga banal na altar buda bangui…

Ika an pighahanap ko sa paros, Kalachuchi,

Kaherak man sindang mas muyang hilingon ka sa harayo,

Kun igwa,

Pero ika na tunay kun mamoot,

Pigpipintahan mo an samuyang abong buhay

Ki pula, dilaw puti, rosa sa manlaen-laen na antas,

Hilinga an kinaban,

Dai ka sana mapagal sa pagpapadaba

Ta puso mi maluluyos

Kun parong nin daga an maghadi digdi sa kinaban.

Mga burak sa mga harong na pawid

2009-04-12T23:02:00.000-07:00

An mga harong na may mesang dai napapahiran ki mantika

Buda mga platong dai nabubugtakan ki karne,

Saindang daga igwa sindang Rosal, Rosas, Santan, Kampanilyang Dilaw,

Oro-alas Kwarto, Balbas pusa, Sampaguita,

Idto su saindang kayamanan; an kayamanan ki kinaban,

Dai mo matataram na mas maugma ka sainda kun mahalnason an saimong mesa

Ta pigkakakan mo an mga orig, mga manok, an mga baka,

Igwa ka man na mga burak saimong higod pero dai mo matataram na mas magayon an saimong mga orkids,

An saimong mga Daisies, dai mo matataram na mas mahamot

Ta dai mo garo kaya mag-istar sainda, maghangos saindang paros, maghampang saindang mesa,

Hilingon sinda sa harayo, itdo an saimong magiginibo,

Nangangarap ka na kuta kaya mong lakawon an mga aldaw saindang sapatos,

Na kaya mong kahurunon an aldaw, an bangui,

Na mabubuhay ka maski sain ka man mapaduman.

Kun amay ka sana nagkakaturog

2009-04-12T23:01:00.000-07:00

Pirmi,

Muya takang pakaturugon

Sagkod mahiling kong maghakab an mga estrelya

Saimong mga mata.

Pirmi,

Muya kong alayan ka ki kansyon

Sagkod an musika magdulay saimong mga labi

Sa paagi nin saimong mga padabang ungol.

Pirmi

An saimong buhok

Muya kong tawidon

Pagkatapos maduman naman ako saimong mga labi

Sagkod mapagal an sakuyang mga muro.

Pirmi

Muya kong magdukot an satuyang mga abaga,

An satuyang mga daghan,

An satuyang nalalamos na mga labi.

Pirmi

Muya kong madangog an saimong puso

Pigtataram an sakuyang pangaran,

Pirmi

Habo kong maghali an bangui

Ta sa bangui

Mas harani kita sa lambang saro.

Kun gurano kamundo an buhay ta

2009-04-12T23:00:00.000-07:00

Habo tang paghurunan an ugat nin luha nin kinaban…

Haputon ta an kataning ta

Kun nata siya nakahungko,

Pigkukurab kitang baka lalo siyang makulugan,

Pero satuya bang pigbalo?

Habo tang maghapot ta muya ta ki tuninong na pagkaturog.

Pero gurano katuninong an satuyang pangiturugan

Kun an satuyang kataning salming kan satuyang namamatean?

Baka sa paghapot sa kataning makua ta an simbag.

Kun habo tang haputon an satuyang sadiri,

Haputon ta su iba,

Duman mapuon an paghahanap,

Baka lamang mahali an puling sa mata,

Balua.